No. 1 News Portal from Nepal, Political News, Science, Social, Sport, Ecomony, Business, Entertainment, Movie, Nepali Model, Actor, Actores, Audio, Video, Interview

युनेस्को महासभामा शिक्षामन्त्रीको सम्बोधन : महामारीमा पनि शैक्षिक निरन्तरता

काठमाडौं । शिक्षा, विज्ञान तथा प्रविधिमन्त्री देवेन्द्र पौडेलले फ्रान्सको पेरिसमा जारी युनेस्कोको ४१औँ महासभालाई सम्बोधन गर्दै कोभिड–१९ महामारीका समयमा पनि नेपालले बालबालिकाको शिक्षालाई निरन्तरता दिएको बताएका छन् ।

मन्त्री पौडेलले महामारीका समयमा कम प्रविधिको प्रयोग हुने टेलिभिजन, सामुदायिक रेडियो र घरमा आधारित सिकाइ सामग्रीको प्रयोग गरेर बालबालिकाको शिक्षालाई निरन्तरता दिएको जानकारी गराए ।

महामारीले आफूहरूलाई शिक्षामा डिजिटल डिभाइसको महत्वका बारेमा सोच्न बाध्य बनाएको उनको भनाइ छ । शिक्षा, स्वास्थ्य, लैङ्गीक समानता र महिला सशक्तिकरणजस्ता प्रमुख क्षेत्रमा नेपालले महत्वपूर्ण सफलता हासिल गरिसकेको बताउँदै मन्त्री पौडेलले दिगो विकासका लक्ष्यलाई अपनाएको जानकारी दिए ।

विकासका प्रयासलाई निर्देशित गर्न सरकारले ‘सुखी नेपाली, समृद्ध नेपाल’को राष्ट्रिय नारा बनाएको पनि उनले बताए । साथै, ‘सिकाइ कहिल्यै रोकिँदैन’ भन्ने दृढ प्रतिबद्धताका साथ सरकारले स्थानीय निकायलाई उपयुक्त निर्णय लिन अनुमति दिने आवश्यक कानूनी प्रक्रिया तयार गरिसकेको उनले बताए ।

महामारीको प्रतिकूल प्रभावका बाबजुद पनि शिक्षा क्यालेन्डरलाई निरन्तरता दिन आवश्यक निर्देशन र नियमावली बनाएको उनले जानकारी दिए । वैकल्पिक शिक्षामा राम्रो अनुभवका लागि आफूहरू डिजिटल प्लेटफर्म डिजाइन र कार्यान्वयनको प्रयासमा रहेको उनको भनाइ छ ।

विज्ञान र प्रविधिको विकासलाई सरकारले प्राथमिकता दिएको उल्लेख गर्दै मन्त्री पौडेलले आविष्कार र अनुसन्धानलाई बढावा दिनुका साथै युवा वैज्ञानिकहरूलाई ‘आर्टिफिसियल इन्टेलिजेन्स’मा अर्को कदम चाल्न प्रोत्साहित गर्ने प्रतिबद्धता व्यक्त गरे ।

त्यसैगरी, हरितगृह ग्यास उत्सर्जनमा नगण्य हिस्सा भए पनि जलवायु परिवर्तनको प्रतिकूल असरबाट नेपाल नराम्ररी प्रभावित बनेको मन्त्री पौडेलले बताए । पेरिस सम्झौताको कार्यान्वयनमा प्रतिबद्ध रहेको जानकारी गराउँदै उनले जलवायु–उत्थानशील विकास मार्ग प्रदान गर्न आफूहरू प्रतिबद्ध रहेको दोहोर्याए ।

मूर्त र अमूर्त सम्पदाको संरक्षण र संरक्षण नेपालको राष्ट्रिय प्राथमिकता रहेको बताउँदै उनले सन् २०१५ को महाभूकम्पका कारण ध्वस्त भएका राष्ट्रिय तथा विश्वसम्पदाको सन् २०२२ सम्ममा पुनर्निर्माण र पुनर्निर्माणका लागि नेपालले सबै प्रयास गरिरहेको जानकारी गराए ।

महासभामा शिक्षा मन्त्रालयका सचिव रामप्रसाद थपलिया, नेपालका स्थायी प्रतिनिधि राजदूत दीपक अधिकारी र युनेस्कोका लागि नेपालका सहायक महासचिव डा.बाबुराम अधिकारी सहभागी छन् ।

प्रकाशित: २७ कार्तिक २०७८, शनिबार १७:१९
Comments
Loading...