पाल्पा । वाइसिएलले तिनाउँ क्षेत्रमा संचालित चुनढुंगा खानीले सरकारलाई रोयल्टी र स्थानीयको माग सम्बोधन नगरे खानी नै बन्द गर्ने चेतावनी दिएको छ ।
यस क्षेत्रमा संचालित खानीहरुले परिमाण भन्दा बढी उत्खनन् गरेको, टिप्परले ओभरलोड बोकेर राजमार्ग र स्थानीयको घरबस्ती जोखिममा राखेको वाइसिएल तिनाउँका अध्यक्ष कमल श्रेष्ठले जानकारी दिए ।
तानसेनमा पत्रकार सम्मेलन गरी वाइसिएलले गाउँपालिकालाई दिनुपर्ने राजश्व नदिएको, स्थानीयको समस्या समाधानमा ध्यान नदिइएको, वातावरणीय प्रभाव मूल्यांकन नभएको, सामुदायिक उत्तरदायित्व पूरा नगरेको आरोप लगाएको छ ।
समस्या समाधानमा गाउँपालिका उदासिन देखिएको भन्दै उसले बुधबार गाउँपालिका घेराउ गर्ने र खानी बन्द समेतका चरणबद्ध आन्दोलनका कार्यक्रमसमेत सार्वजनिक गरेको छ ।
जसअन्तर्गत बुधबार गाउँपालिका घेराउ गर्ने, जनदवाव दिने, चुनढुंगा खानीमा टिप्पर प्रवेश रोक गर्ने, टिप्पर खानी नै बन्द गर्ने लगायतका कार्यक्रमहरु सुरु गरेको छ । वाइसिएलले आफ्नो आन्दोलनमा सहयोग गर्न र प्राकृतिक दोहन रोक्नमा सहयोग गर्न राजनीतिक दल, पत्रकार, नागरिक समाज सबैमा आग्रह समेत गरेको छ ।