सोमबार बिहान मेट्रो मनिलाको स्टेट युनिभर्सिटी क्याम्पसको एक आवासीय क्षेत्रमा आगलागी हुँदा कम्तीमा आठ जनाको मृत्यु भएको छ।
फायर प्रोटेक्शन ब्युरोका अधिकारीहरूलाई उदृत गर्दै स्थानीय रेडियोले जनाएअनुसार स्थानीय समयअनुसार बिहान ५ बजे क्वेजोन शहरको उपनगरमा रहेको युनिभर्सिटी अफ फिलिपिन्स परिसरमा आगलागी हुँदा पीडितहरू आफ्नै निवासमा फसेका थिए । मृत्यु हुनेमा बालबालिका पनि छन् ।
आगलागीबाट करिब ८० घर जलेर नष्ट भएका र २५० परिवार प्रभावित भएका जनाइएको छ । आगलागीबाट बच्न केही बासिन्दाहरू जलिरहेको घरबाट हाम फालेर भाग्दा घाइते भएका छन्। करिब दुई घण्टापछि दमकलले आगो निभाएको थियो ।
प्रकाशित: १९ बैशाख २०७९, सोमबार ०७:१७