No. 1 News Portal from Nepal, Political News, Science, Social, Sport, Ecomony, Business, Entertainment, Movie, Nepali Model, Actor, Actores, Audio, Video, Interview

गठबन्धनले दश महिनामा एमालेलाई गाली गर्नु बाहेक कुनै काम गरेनः ओली

0

रौतहट । नेकपा एमाले अध्यक्ष केपी शर्मा ओलीले गठबन्धन सरकारले देशको दश महिना खेर फालेको आरोप लगाएका छन् । शुक्रबार रौतहटको सदरमुकाम गौरमा आयोजित चुनावी सभालाई सम्बोधन गर्दै अध्यक्ष ओलीले सरकार गठन भएदेखि गठबन्धनले एमालेलाई गाली गर्नु बाहेक कुनै काम नगरेको बताएका हुन् ।

गठबन्धनको चितवनमा बिहीबार भएको संयुक्त चुनावीसभामा माधव नेपाल र प्रचण्डको अभिव्यक्तिको आलोचना गर्दै अध्यक्ष ओलीले नेपाललाई नै कुहिएको फर्सी र कुलङ्गार भएको आरोप लगाए । चितवनमा आयोजित चुनावी सभामा माधव नेपालले नेकपा एमालेलाई कुहिएको फर्सीको संज्ञा दिएका थिए ।

१५ वर्षसम्म पार्टीको प्रमुख रहेको र देशको प्रधानमन्त्री बनाएको पार्टीलाई आरोप लगाएर नेपालले आफ्नो प्रवृत्ति देखाएको ओलीले बताए । अध्यक्ष ओलीले माधव नेपाल नातावादमा अल्झिएको भन्दै रौतहटको विकास नगरेको र गर्न पनि नदिएको आरोप लगाए । आफूले पचास वर्षअघि महेन्द्र मोरङ क्याम्पसमा माधवकुमार नेपाललाई राजनीतिमा आउन प्रेरित गरेको भन्दै अध्यक्ष ओलीले सर्पलाई दुध खुवाएको सरह अहिले आफूलाई लागेको भनी पछुतो गरे ।

यसैगरी चितवन सभामा आफ्नी छोरीलाई भोट नदिए देश दुर्घटनामा जाने प्रचण्डको अभिव्यक्तिप्रति आपत्ति जनाउँदै ओलीले चितवनका जनताले डर र धम्कीविरुद्ध सल्लाह गरिरहेको बताए ।

ओलीले प्रचण्डको धम्कीलाई रुखको हाङ्गामा बसेर हाङ्गा हल्लाउँदै मान्छे तर्साउने बाँदरको संज्ञा समेत दिए । रौतहटसँग आफ्नो भावनात्मक र प्रत्यक्ष सम्बन्ध रहेको बताएका ओलीले जिल्लाको विकासमा आफूले महतपूर्ण योगदान दिएको बताए ।

 

प्रकाशित: २३ बैशाख २०७९, शुक्रबार १४:२५

Leave a Reply