डा. युवराज संग्रौला ।
प्रेम आचार्यको आत्मदाह घटना सानो घटना होइन । विगत केही महिनादेखि मलाई भेट्न यस्ता थुप्रै पीडितहरु आउनु भयो । केही साथीहरूका समस्या संम्बन्धित निकायामा कुरा राख्ने कार्य पनि भयो । यो अपराध गर्नेहरुमाथि कडा कार्बाही हुनुपर्छ ।
१. यस्तो अवस्थाका पछाडि न्यायप्रति मानिसको आस्थाको नास पनि हो। म नजिकबाट हेरिरहेको छु ।
२. देशमा उद्यम गर्ने युवाहरुमाथि दमन भैरहेको छ र यो देशको अर्थतन्त्र समाप्त गर्ने योजनाअनुसार भैरहेको छ। उत्साही भएर लगानी गर्ने युवाहरुमाथि, बिगत तीन बर्षको कोभिडको महामारी देख्दा देख्दै बैंकहरुले धितो लिलाम गर्ने वहानामा दमन र शोषण गरिरहेका छन् । माफियासँग तालमेल गरि मानिसलाई मर्न बाध्य पारिरहेका छन् ।
३. देशको उत्पादन समाप्त गर्न केही विदेशप्रति बफादार व्यापारीहरु लागेका छन् । बैंकहरु उनीहरुका कब्जामा छन् । बीमा कम्पनी पनि उनीहरुको कब्जामा छन् । संसद पनि उनीहरुको कब्जामा पुगेको छ । यस्ता केही व्यापारीलाई कानुन लाग्दैन । एउटै एलसीबाट तीन पटक सामान आयत गर्ने छुट पनि छ ।
मित्रहरु हेक्का राख्नु होस, देशै रहेन भने कहाँ घुस खानु हुन्छ, कहाँ दलाली गर्नु हुन्छ । राष्ट्र बिनास गर्नेको इतिहास कलंकित हुन्छ। विदेशमा बस्ने कतिपय मित्रहरु बाबुआमालाई हुण्डीबाट पैसा पठाउन लगाएर देश टाट पल्टाउने काम प्रोत्साहित नगर्नुहोस् । तपाईले हुण्डीबाट प्राप्त गरेको विदेशी पैसा अरबमा गरीबले ज्यान दिएर कमाएको रकम हो । प्रधानमन्त्रीज्यू इमान्दार अर्थशास्त्री बोलाएर सोध्नुहोस् देश त मन्दीको बाटो तिर लागिसक्यो। सडकका दुई साइडमा देखिने “टु लेट“ का साइनबोर्ड हेर्नुहोस् । काठमाडौमा गरीब बस्न नदिने आतंक कसरी प्रकट हुँदैछ।
प्रेम आचार्यको घटनाको छानबिन गर्नुहोस् । अन्यथा मानिसका न्यायका पुकार विद्रोहमा परिणत हुन सक्छन् । नेपाल जर्जर हुने बाटो तिर लागेको छ । सत्ताका खेल छोडेर जनताको पक्षमा उभिने हिम्मत गर्नुहोस् । चर्चा उत्तेजनाका खेलले दुनियाँ बदलिन्न भन्ने पनि बुझ्नु आवश्यक छ।