काठमाडौं । जनमत पार्टीका अध्यक्ष डा. सीके राउतले मधेसमा जम्बो मन्त्रिपरिषद बनाउनु आफ्नो पार्टीको बाध्यता भएको बताएका छन् । मुख्यमन्त्री सतिसकुमार सिंहले मंगलबार पाँच राज्यमन्त्री थप गरी २० सदस्यीय मन्त्रिपरिषद पुर्याएकोमा स्पष्टीकरण दिँदै अध्यक्ष राउतले आफूहरुले चाहेर केही नहुने बताएका हुन् ।
उनले मधेश सरकार जनमतको नभई गठबन्धनको भएको बताएका छन् । उनले भनेका छन्, ‘बुझ्नुपर्छः यो मधेस सरकार गठबन्धनको हो, जनमतको होइन । गठबन्धन र खासगरी दुई ठूला पार्टीले निर्धारण गरेको हो कि कति मन्त्रालय कसले राख्ने, कति राज्यमन्त्री राख्ने, कुन कुन मन्त्रालय कसले राख्ने यसमा हाम्रो केही चल्दैन किनकी जनमत पार्टीको सीट संख्या मधेस प्रदेशमा पनि निर्णायक होइन, अहिलेकै गठबन्धनमा पनि हामी बिना नै मधेश सरकार बन्छ त्यसैले हामीले चाहेर मात्र हुँदैन ।’
मुख्यमन्त्री सिंहले मंगलबार नेपाली कांग्रेसबाट दुई र नेपाल कम्युनिष्ट पार्टी (एमाले), जनमत पार्टी र लोकतान्त्रिक समाजवादी पार्टी एक/एक जना राज्यमन्त्रीमा नियुक्त गरेका थिए ।
कांग्रेसका तर्फबाट रेखा ठाकुर भूमि व्यवस्था, कृषि तथा सहकारी राज्यमन्त्री र निलमकुमारी रजक ऊर्जा, सिँचाइ तथा खानेपानी राज्यमन्त्रीमा नियुक्त भएकी छन् । त्यसैगरी एमालेका मोहम्मद जैद आलम भौतिक पूर्वाधार विकास राज्यमन्त्री, लोसपाका रामबाबु यादव शक्षा तथा संस्कृति राज्यमन्त्री र जनमतका शम्भुकुमार साह उद्योग, वाणिज्य तथा पर्यटन राज्यमन्त्रीमा नियुक्त भएका छन् ।
१२ मन्त्रालय रहेको मधेसमा ५ जना थपिँदा मन्त्रीको संख्या २० पुगेको छ । मधेसमा २० सदस्यीय मन्त्रिपरिषद बनाइएकोमा सर्वत्र आलोचना भएको छ ।
