बारा । बाराको रामराजा बहुमुखी क्याम्पसका प्रमुख हरिभुषण कुशवाहाको हत्यामा संलग्न मुख्य आरोपीलाई प्रहरीले पक्राउ गरेको छ ।
गत जेठमा कुशवाहा हत्याका आरोपी सुरेन्द्र कुशवाहालाई जिल्ला प्रहरी कार्यालय, बाराको टोलीले पक्राउ गरेको हो । मोरङ्ग जिल्लामा लुकिछिपी बसेका उनलाई जिल्ला प्रहरी कार्यालय बाराको टोलीले बुधबार पक्राउ गरी ल्याएको प्रहरीले जनाएको छ ।
सुरेन्द्रले जग्गासम्बन्धी विवादमा हरिभुषणको गोली हानी हत्या गरेको प्रारम्भिक अनुसन्धानबाट खुलेको प्रहरीले जनाएको छ । गत जेठ ३२ गते शुक्रबार बाराको आदर्शकोतवाल गाउँपालिका–३, बतरामा क्याम्पस प्रमुख कुशवाहामाथि गोली प्रहार भएको थियो ।
गम्भीर घाइते उनलाई बयोधा अस्पताल, वीरगञ्ज लगिएको थियो । त्यसबेला उनले गोली प्रहारमा सुरेन्द्रको संलग्नता रहेको बताएका थिए । उनको उपचारको क्रममा मृत्यु भएको थियो ।
