काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्डले स्थानीय तहको उपनिर्वाचन भ्रष्टाचारको पक्ष र विपक्ष छुट्याउने जनमत संग्रह भएको बताएका छन् ।
बिहीबार कीर्तिपुरको नगाउँ दोबाटोमा आयोजित पार्टीको चुनावी सभालाई सम्बोधन गर्दै प्रचण्डले हेर्दा उपचुनाव भएपनि यो भ्रष्टाचारको पक्ष र विपक्ष छुट्याउने जनमत संग्रह भएको बताएका हुन् ।
उनले उपनिर्वाचनमा नेपाली जनता भ्रष्टाचारका पक्षमा छैनन् र भ्रष्टाचारका विरुद्धमा छन् भन्ने सन्देश दिने बताए । उनले एमाले–कांग्रेस मिलेर बनेको गठबन्धन सरकार संविधान मिचेर बनेको आरोप लगाए। उनले यो सरकार अप्राकृति भएको भन्दै भ्रष्टाचार र बिचौलियालाई बचाउन लागिपरेको बताए ।
उनले भने, ’संविधान मिचेर बनेको सरकार हो यो । यो सरकार संविधान विरोधी छ। अप्राकृतिक छ। लोकतान्त्रिक देशहरूमा दोस्रो पहिलो पार्टी मिलेर सरकार बनाउने चलन छैन । हिन्दूस्थानलाई हेरे हुन्छ।’
उनले अहिले सरकारको नेतृत्व गरिरहेकाहरूमा नै भ्रष्टाचारको तिर सोझिएपछि अप्राकृतिक ढंगबाट सरकार बन्न पुगेको बताए ।
उनले भने, ‘भ्रष्टाचारविरोधी अभियानको तीर ठूलो ठाउँमा पुग्ने भयो । त्यो अहिले सरकारको नेतृत्व गरेकाहरूकै ठाउँमा पुग्ने भयो । बेचन झा र प्रतिक थापा पक्राउ परेपछि अभियानको सुई कता सोझियो भन्ने बुझ्नुभएकै छ ।’
अध्यक्ष प्रचण्डले कीर्तिपुर नगरपालिकाको मेयरका उम्मेदवार प्राडा.शिवशरण महर्जनलाई समर्थन गर्न समेत आग्रह गरे ।
