कायरो । हमासको प्रतिनिधिमण्डलले इजिप्टका गुप्तचर अधिकारीहरूसँग गाजामा युद्धविराम बारे छलफल गरेको छ ।
‘प्रतिनिधिमण्डलले इजिप्टको जनरल इन्टेलिजेन्सका प्रमुख मेजर जनरल हसन रसद र इजिप्टका धेरै गुप्तचर अधिकारीहरूसँग भेट गरी युद्ध र आक्रमण रोक्ने, सहायता ल्याउने र इजिप्टसँगको गाजाको सीमामा रफाह क्रसिङ खोल्ने तरिकाहरूबारे छलफल गरेको’ आइतबार साँझ कायरो बैठकमा सहभागी हमासका एक वरिष्ठ अधिकारीले बताए ।
“इजिप्ट, कतार र टर्कीले युद्धविराम र कैदी आदानप्रदानका लागि सहमतिमा पुग्न ठूलो प्रयास गरिरहेका छन्”, कायरोमा उपस्थित हमासका अर्का अधिकारीले भने, “हाम्रा प्यालेस्टिनी जनता (इजरायली प्रधानमन्त्री बेन्जामिन) नेतान्याहुमाथि युद्ध रोक्न र लेबनानमा भएको जस्तो सम्झौतामा पुग्न अमेरिकी र अन्तर्राष्ट्रिय दबाबको प्रतीक्षामा छन् ।”
इजरायल र लेबनानको सशस्त्र समूह हिजबुल्लाहले संयुक्त राज्य अमेरिका र फ्रान्सको मध्यस्थतामा लेबनानमा युद्धविराममा सहमति जनाएको केही समयपछि यो बैठक भएको हो ।
अमेरिकी राष्ट्रपति जो बाइडेनले नयाँ रूपमा युद्धविरामका लागि पहल सुरु गर्ने र आफ्ना दूतहरूलाई टर्की, कतार, इजिप्ट र क्षेत्रका अन्य सहभागीहरूसँग संलग्न हुन निर्देशन दिएको उनका राष्ट्रिय सुरक्षा सल्लाहकार जेक सुलिभानले गत साता बताएका थिए ।
इजिप्टका अधिकारीहरूले आइतबार हमाससँगको कुनै पनि बैठक भएको बारे सार्वजनिक रूपमा टिप्पणी गरेनन् ।
पहिलो अधिकारीले हमासले सहमति जनाउने कुनै पनि सम्झौताले युद्धको सुरुआतदेखि समूहले उठाएका शर्तहरू समेट्नुपर्ने बताए ।
यी शर्तहरूमा पूर्ण युद्धविराम, पूर्ण इजरायली सैन्य फिर्ता, गाजामा बाधाविहीन मानवीय सहायता प्रवेश, विस्थापित प्यालेस्टिनीहरूको घर फिर्ती, ‘एकै पटक वा दुई चरणमा बन्दी विनिमयको गम्भीर सम्झौता’ र युद्धले क्षतिग्रस्त प्यालेस्टिनी क्षेत्रको पुनर्निर्माण समावेश छन् ।
इजरायलले पनि बारम्बार हमासलाई वार्तामा ढिलाइ गरेको र इमानदारीपूर्वक सम्झौतामा पुग्न नचाहेको आरोप लगाएको छ ।
– युद्धपश्चातको गाजा बैठक –
हमासका एक वरिष्ठ अधिकारीले ‘इजिप्टको प्रायोजनमा’ हमास प्रतिनिधिमण्डलले आइतबार बेलुका फतह आन्दोलनको एक प्रतिनिधिमण्डलसँग भेट गरेको बताए । फतह हमासको लामो समयदेखिको प्रतिद्वन्द्वी हो र वर्तमानमा प्यालेस्टिनी प्राधिकरणअन्तर्गत अधिकृत पश्चिमी किनारमा शासन गरिरहेको छ ।
उनले बैठक ‘आन्तरिक प्यालेस्टिनी अवस्था र युद्ध समाप्त भएपछि गाजा पट्टीको व्यवस्थापनका लागि व्यवस्थापन’ मा केन्द्रित रहेको बताए ।
वार्ताले सबै प्यालेस्टिनी गुटहरूसँग सहमतिमा पट्टीको व्यवस्थापन गर्न र सहायता, क्रसिङ र पुनर्निर्माणको निरीक्षण गर्न स्वतन्त्र प्रशासनिक समितिको आकारमा सहमत हुने लक्ष्य राखेको थियो ।
गाजामा फतह नेतृत्वका सदस्य जमाल ओबेदले इजिप्टले युद्ध रोक्न तीव्र प्रयास गरिरहेको बताए । “पहिलो प्राथमिकता इजरायली सेनाको फिर्ती, विस्थापितहरूको पुनर्वास, क्रसिङ खोल्ने, हाम्रा पीडित जनताको राहत र प्यालेस्टिनी राष्ट्रिय प्राधिकरणको व्यवस्थापन र निगरानीमा पुनर्निर्माण हो”, उनले भने ।
‘युद्ध रोक्न र प्यालेस्टिनी घरलाई व्यवस्थित गर्न’ र युद्ध समाप्त भएपछि गाजामा शासनले कस्तो आकार लिनेछ भन्ने कुरामा सहमत हुन फतह र हमासबीचको बैठक कायरोमा महत्त्वपूर्ण रहेको ओबिदले बताए ।
