काठमाडौं । नेपाल पुस्तकालय संघले अन्तर्राष्ट्रिय शिक्षा दिवसको अवसरमा पहिलो वार्षिक पत्रिका ‘पुस्तकालय दर्पण’ प्रकाशित गरेको छ। काठमाडौंमा आयोजित कार्यक्रममा संघले पुस्तकालय विज्ञान प्रवद्र्धन र शिक्षामा पुस्तकालयहरूको महत्त्व उजागर गर्ने प्रयासमा महत्त्वपूर्ण कोसेढुङ्गो सावित गरेको छ ।
कार्यक्रममा शिक्षाविद्हरू, पुस्तकालय पेशाकर्मीहरू, र विभिन्न क्षेत्रका विशिष्ट अतिथिहरूको उपस्थिति रहेको थियो । प्रमुख अतिथि दशरथ थापा, विशिष्ट अतिथि, लक्ष्मण वियोगीका साथसाथै केशर पुस्तकालयका प्रमुख, यादव चन्द्रनिरौला र नेपाल राष्ट्रिय पुस्तकालयका प्रमुख प्रदीप भट्टराईले औपचारिक रूपमा पत्रिकाको विमोचन गर्दै, पुस्तकालय र सूचना विज्ञान क्षेत्रमा ज्ञान, अनुभव, र अनुसन्धान आदानप्रदान गर्न समर्पित मञ्च प्रदान गर्ने नेपाल पुस्तकालय संघको पहलको प्रशंसा गरे ।
‘पुस्तकालय दर्पण’ पत्रिकाले पुस्तकालय पेशाकर्मी, शिक्षक, र विद्यार्थीहरूलाई सूचनाप्रद लेख, अनुसन्धान पत्र, केस स्टडीहरू, र पुस्तकालय विज्ञानमा हुने नवीनतम प्रवृत्ति र विकासहरूको अद्यावधिक जानकारी प्रदान गर्ने महत्त्वपूर्ण स्रोतको रूपमा सेवा गर्ने लक्ष्य राखेको छ। यस पत्रिकाले नेपालका शैक्षिक तथा पुस्तकालय समुदायहरूमा शिक्षण र नवप्रवर्तनको संस्कृति प्रवद्र्धन गर्न नेपाल पुस्तकालय संघको प्रतिबद्धतालाई उजागर गर्दछ।विमोचित म्यागेजिनमा २३ लेख समावेश छन् । प्रकाशित म्यागेजिनको पत्रकार लक्ष्मण वियोगीले संक्षिप्त समीक्षा प्रस्तुत गरेका थिए ।
प्रधान सम्पादक रमेश निरौलाले शिक्षामा पुस्तकालयहरूको महत्वपूर्ण भूमिकालाई प्रकाश पार्दै, ज्ञानको समान पहुँच सिर्जना गर्न र समाजमा सूचनाको खाडल हटाउन पुस्तकालयहरूको महत्त्वलाई जोड दिए ।
नेपाल पुस्तकालय संघका अध्यक्ष पुष्पराज सुवेदीले ‘पुस्तकालय दर्पण’ प्रकाशन सम्भव बनाउन योगदान पुर्याउने सम्पादकीय समूह, योगदानकर्ताहरू र सरोकारवालाहरूलाई धन्यवाद व्यक्त गर्दै भने, ‘यो पत्रिका हाम्रो पुस्तकालय पेशाकर्मीहरूको सामूहिक प्रयासको प्रतिनिधित्व हो । शिक्षामा र समुदाय विकासमा पुस्तकालयहरूको भूमिकालाई सुदृढ गर्न हाम्रो समर्पणको प्रमाण हो।’
कार्यक्रममा ‘शिक्षा र विकासका खम्बा पुस्तकालय’ विषयक प्यानल छलफल समेत भएको थियो, जहाँ विज्ञहरूले पुस्तकालय स्रोतहरूको उपयोग गरेर नवप्रवर्तन र आजीवन शिक्षालाई प्रवद्र्धन गर्ने दृष्टिकोण साझा गरे ।
