No. 1 News Portal from Nepal, Political News, Science, Social, Sport, Ecomony, Business, Entertainment, Movie, Nepali Model, Actor, Actores, Audio, Video, Interview

निधार फेरि पनि खाली नै भो, तपाइहरूको न्यानो माया अनुभूत गरिरहेको छु यति बेला दिदीहरु

  • 80
  •  
  •  
  •  
  •  
    80
    Shares

मुक्ती गौतम, क्यानडाबाट ।

स्मृतिमा तिहार !

बिहानै काग आएर बस्यो, घर पछाडि सल्लाको रुखमा । तिहारको याद लिएर आयो । अरू बेला पनि काग देख्दा दुइटा कुरा दिमागमा आईहाल्छन्, एउटा पाहुना आउने कुरा र अर्को तिहार । जाडोमा चरा देखिँदैनन् यतातिर, अरुबेला देखिदा बाल्यकालका अनगिन्ती सम्झनाहरू बोकेर आउँछन् । कहिले यता र कहिले उता गर्दै हिँड्ने यी चराहरु देख्दा आफ्नै नियति सम्झिईन्छ घरी घरी । लामा र छोटा अनगिन्ती उडानहरू भर्दै ठाउँ बदली रहने चराहरु र विदेशियर आफ्नो गाउँ बिर्सन नसक्ने म जस्ता प्रवासीहरूका कथाहरू उस्तै उस्तै त होलान् !

काग कराउँदा, आगो फरफराउँदा कसैको पर्खाई हुन्थ्यो घरमा । म आफू सानो छँदा बाहिर पढ्न गएका दाइ आउने व्यग्र प्रतिक्षा रहन्थ्यो यती बेला । आमा बाहिर हेरि रहनुहुन्थ्यो, आँखै आँगनसँग जोडिएको दुई पर्खाल बीचको भित्र छिर्ने साँघुरो बाटोमा टाँसिएका हुन्थे आमाका । भित्र गढेका आमाका आँखाहरूमा त्यो साँगुरो बाटो प्रष्ट देखिन्थ्यो दशै तिहार भरि । दाइ नआएको वर्ष त पछि पछिसम्म पनि त्यतै हुन्थ्यो त्यो बाटो मधुरा आँखाहरूमा ।

सानी दिदीको विवाह भयो, दिदी थपिनु भयो आमाको त्यो पर्खाइमा । पछि म पनि थपिएँ कलेज पढ्न थालेदेखि । मेरो जागिर सुरु भएपछि आमा आफै त्यो गाउँ छोडेर कहिले काठमाण्डौ मसँगै भौँतारिनु हुन्थ्यो दशै तिहारमा, कहिले गाउँमा पुग्नुहुन्थ्यो । जीवनको अन्तिम दशै तिहार त यतै क्यानडामा मनायौं । आमा जता भएपनि त्यो घर नै हुने रहेछ । गत साल १७,१८ वर्ष पछि घर जाँदा, आमा नभएको त्यो घरमा पुग्दा अरूकै घर पुगे झैँ भयो ।

हामी जम्मा १० जना जन्मिएका रे, अहिले तीनजना बाँकी छौं, र त्यो पनि तीनतिर । छ जना त सानोमै मरेका तर एकजना मेरो दाजु भने मारिएका तत्कालीन विद्रोही माओबादीबाट । ठूली दिदी जन्मिए पछि अरू केही दिदीहरू र सायद एकजना दाइ पनि जन्मिएर अकालमै मर्नुभयो रे । बा बिरक्तिएर घर छोडेर हिँड्नु भएछ त्यसपछि । स्वर्गद्वारी पुगेर प्रभुको दर्शन पछि दुइटा छोराको बर लिएर घर फर्किनु भएको रे बा । माओबादीबाट मारिएका मेरा दाइ यदु गौतमको जन्म चमत्कार नै भयो मेरा बा आमाका लागि । दाइले पुरै खुसी लिएर आउनु भएछ घरका लागि र आमाका लागि त पुरै संसार लिएर ।

दाइको महत्व हामी सबैको अघि खास थियो त्यसैले पनि । पछि दाइ घरमा आउँदा कहिले कहि त म आफू त्यहाँ भएको पनि महसुस हुँदैनथ्यो, तर आफै नभएको त्यो अनुभूति पनि कम्ती मजाको थिएन ! दाइ देख्दा सबै भुल्थें म ।

दाइ कम्युनिस्ट हुनुभयो । कहिले भूमिगत र कहिले जेल । दशै तिहारमा मौकाले घर आउँदा टीका वर्जित हुन्थ्यो हाम्रा लागि । अरूका निधार हेरेर कल्पिन्थ्यौं हामी । मेरो सानो दिमागमा टीका लाउन नपाउनुको अर्थ त घुस्दैनथ्यो तर दाइले गरेकोले ठीकै होला भन्ने लाग्थ्यो त्यो बेला । बिचरा दिदीहरू भने नमीठो मुख लाएर बसि रहनुहुन्थ्यो । म दाइको पछि लाग्दै, उहाँका कुरा सुन्दै टीका बिर्सन्थें । दाइ आएपछि घरको रमझम नै अर्कै !

बहुदल आएपछि दाइ रुकुम नै फर्किनु भयो र अलि फेरिनु पनि भो । खसी काट्न थालियो, जमरा राख्न थालियो घरमा, रोटी पाक्थे । पछि पछिसम्म खाना पाईने ती रोटीहरू अझै सम्झनामा आउँछन् आमासँगै । त्यसपछि दिदीहरू पनि तिहारमा खुसीले मच्चिदैं आउन थाल्नु भो । हाम्रो घरमा दसै तिहार बल्ल रमाइलो हुन थाल्यो ।

तर लामो समय टिकेन यो खुसी । ०५५ सालमा दाइ निर्ममतापूर्वक मारिनु भो । पर्खाई नै पर्खाई भो सधैँ भरि । अहिले आमा पनि हुनुहुन्न र दाइ पनि – तिहार आएको त थाहा हुन्छ गएको कहिल्यै थाहा भएन त्यसपछि । बारीमा फूलेका हजारी किन फुल्छन् होला जस्तो लाग्छ, मखमली किन त्यति गाढा देखिएर हामीलाई जिस्क्याउँछन् जस्तो लाग्छ । आफू विदेशियपछि त दशै तिहार सधैँ बिथोल्न आउँछ यो मन । पुराना स्मृतिहरू बोकेर आँखाभरि ती दिनहरू सम्झनु बाहेक अब केही बाँकी रहेन झैँ हुन्छ यो बेला विदेशमा ।

यो याम गर्मी सकिएर हिउँद लाग्न थाल्छ यता । जंगलभरि रुखहरू फुल्छन् मनै लोभ्याउने गरि । जाडोमा नाङ्गिनु अघि उखरमाउलो भएर राता, पहेँला, बैजनी र के के भएर जङ्गल पुरै ढाक्छन् । झर्नु अघि यसरी नफूले पनि त हुने ! तर फुल्छन् आँखाले हेर्दा नभ्याउने गरि पर पर सम्म, जाऊँ जाऊँ भैरहन्छ घरी घरी त्यतै मन लोभिएर । घाम लाग्दा अझ यो जाडो सुरु हुन लागेको याम प्यारो लाग्छ, घामका वाक्ला किरणहरू रुखमा पर्दाको कुरा त अझ अर्कै – मन प्रफुल्ल भएर माथि माथि पुग्छ, दशैँ तिहार सम्झिन्छ अझ जोडले ।

चाडबाडमा धेरै आफन्त सम्झिन्छ । चाडबाडसँग धेरै बाल्य कालका स्मृतिहरू जोडिएका हुन्छन् । यति बेलै दुखद घट्नाहरु श्रृङ्खलाबद्ध भएर आई रहन्छन् दिमागमा, छोडेर गएकाहरुको याद ताजा भएर आउँछ । समयले टाढा बनाउँदो रहेछ भएकै परिवारका सदस्यहरूलाई पनि ।

यति बेला उही गाउँ, उही टौवा, उही मेला, उही मेलामा हात समातेर हिँड्ने साथीका हातहरू याद आइरहेका छन् । लट्ठी बोकेर भैली खेल्दै हिँडेका दौँतरीहरू, भैलीको आम्दानी पछिको भैले टाकुरामा खाएको अली अलि काँचो भातको भोज, भोज पछिको झगडा ताजा भएर आइरहेका छन् । तिहारे लुगा, नयाँ नोट, फुरुङ्ग भएको मन – अहिले आफैसँग छ ।

स्मृति अचम्मको नमेटिने पाटो रहेछ जीवनको । यो नभैदिएको भए जीवन कति खल्लो हुन्थ्यो होला जस्तो लाग्छ । जीवन कहाँ हुन्छ र भनेजस्तो, जीवन कहाँ हुन्छ र खोजे जस्तो ! अप्ठ्यारा दिनहरूमा पनि मीठा स्मृतिहरू भरेर रमाउनुको मजा नै बेग्लै !

यस पटक यो तिहार यिनै स्मृतिहरूसँग बिताउने निधो भयो । मेरा दिदीहरूलाई यतै बाट शुभकामना तिहारको । निधार फेरि पनि खाली नै भो, तर स्मृति त ताजै छन् नि ! तपाइहरूको न्यानो माया अनुभूत गरिरहेको छु यति बेला दिदीहरु ।

तिहारको शुभकामना सबैमा !

तिहार २०७६
टिमिन्स, क्यानडा

Comments
Loading...