काठमाडौं। काठमाडौं उपत्यकामा ट्राफिक नियम उल्लंघन गर्ने सवारीचालकहरूमाथि ट्राफिक प्रहरीले कारबाही तीव्र पारेको छ।
पछिल्लो २४ घण्टाको अवधिमा मात्रै उपत्यकाका विभिन्न स्थानमा सवारी नियम उल्लंघन गर्ने दुई हजार ३९२ जना सवारीचालक कारबाहीमा परेका छन्। यस कारबाहीबापत राज्यकोषमा २१ लाख ९२ हजार ५०० रुपैयाँ राजस्व दाखिला भएको छ।
काठमाडौं उपत्यका ट्राफिक प्रहरी कार्यालयले दिएको जानकारीअनुसार कारबाहीमा पर्नेहरूमध्ये सबैभन्दा धेरै अन्य विभिन्न सवारी नियम पालना नगर्ने एक हजार ३९४ जना रहेका छन्। त्यस्तै, मादक पदार्थ सेवन (मापसे) गरेर सवारीसाधन चलाउने ९२ जना र नियमविपरीत ‘राइड सेयरिङ’ गर्ने १७१ जना चालकलाई कारबाही गरिएको छ।
प्रहरीका अनुसार ट्राफिक संकेत बत्ती (ट्राफिक लाइट) उल्लंघन गर्ने १५१ जना, तीव्र गतिमा सवारीसाधन हुइँक्याउने १४५ जना, र निर्धारित लेन अनुशासन पालना नगर्ने ५६ जना चालक पनि कारबाहीको दायरामा आएका छन्।
यसैगरी, गुड्नका लागि निषेधित क्षेत्रमा हर्न बजाउने १४५ जना, पैदलयात्रु हिँड्ने सडक पेटी (फुटपाथ) मा सवारीसाधन पार्किङ गर्ने १५१ जना तथा एकतर्फी (वानवे) सडकमा नियमविपरीत सवारी चलाउने १५९ जना चालकलाई ट्राफिक प्रहरीले नियन्त्रणमा लिई कारबाही गरेको हो।
