इस्लामावाद। मध्यपूर्वमा जारी तनाव र इरान-अमेरिकाबीचको युद्धलाई अन्त्य गर्ने उद्देश्यले पाकिस्तानको राजधानी इस्लामावादमा वार्ताको अर्को चरण सुरु हुने भएको छ।
हालै मात्र एक साताको लागि गरिएको युद्धविराम सकिनै लाग्दा दुवै मुलुक पुनः वार्ताको टेबलमा बस्न लागेका हुन्। यसअघि नै सम्पन्न पहिलो चरणको वार्ता विना निष्कर्ष टुंगिएकाले यसपटकको वार्तालाई निकै संवेदनशील र अन्तिम मौकाका रूपमा हेरिएको छ।
अमेरिकी राष्ट्रपति डोनाल्ड ट्रम्पले वार्ताका लागि आफ्नो टोली इस्लामावाद पठाउने घोषणा गरेसँगै कूटनीतिक सक्रियता बढेको छ। यसैक्रममा अमेरिकी उपराष्ट्रपति जेडी भान्सले वार्ता टोलीको नेतृत्व गर्ने चर्चा चलेको छ।
यद्यपि, राष्ट्रपति ट्रम्पको पछिल्लो भनाइ र ह्वाइट हाउसको आधिकारिक जानकारीबीच तालमेल नमिलेकाले उपराष्ट्रपति भान्सको सहभागितालाई लिएर केही अन्योल देखिएको छ। राष्ट्रपति ट्रम्पले सुरक्षा संवेदनशीलताका कारण उपराष्ट्रपति भान्सको भ्रमण सम्भव नहुने संकेत गरे पनि ह्वाइट हाउसका अधिकारीहरूले भने भान्सकै नेतृत्वमा टोली इस्लामावाद आउने दाबी गरिरहेका छन्।
वार्ताका लागि अमेरिकी टोलीमा विशेष दूत स्टिभ विटकोफ र राष्ट्रपति ट्रम्पका ज्वाइँ जारेड कुसनर पनि सहभागी रहने बताइएको छ। पाकिस्तानको मध्यस्थतामा भइरहेको यो प्रयासलाई युद्धको विभीषिका रोक्ने अन्तिम कूटनीतिक अवसरका रूपमा लिइएको छ।
ओमानको खाडी र हर्मुजको जलमार्गमा जारी तनाव तथा इरानको आणविक कार्यक्रमलाई लिएर अमेरिका र इरानबीच तीव्र मतभेद रहँदै आएको छ। राष्ट्रपति ट्रम्पले यसअघि नै चेतावनी दिँदै यदि वार्तामार्फत सहमति नजुटे इरानले गम्भीर परिणाम भोग्नुपर्ने बताएका छन्।
पाकिस्तानले दुवै पक्षलाई सहमतिमा ल्याउन उच्च कूटनीतिक पहल गरिरहेको छ। यद्यपि, इरानले वासिङ्टनको माग ‘अतिवादी र अवास्तविक’ भएको भन्दै कतिपय सर्तहरूमा आपत्ति जनाएको छ।
आगामी बुधबार युद्धविरामको म्याद सकिनुअघि नै कुनै ठोस निकास निस्कने वा द्वन्द्व थप उत्कर्षमा पुग्ने भन्ने कुरा यही वार्तामा निर्भर छ। कूटनीतिक विश्लेषकहरूका अनुसार, यदि यो वार्ताले पनि कुनै समाधान दिन सकेन भने मध्यपूर्वको द्वन्द्वले थप भयावह रूप लिन सक्ने चिन्ता बढेको छ।
