काठमाडौं । पूर्वप्रधानमन्त्री एवं नेपाली कांग्रेसका पूर्वसभापति शेरबहादुर देउवा र उनकी पत्नी डा. आरजु राणा देउवा गत १४ फागुनमा उपचारका लागि भन्दै सिंगापुर पुगेका छन् । त्यसपछि देउवा दम्पति नेपालमा हालसम्म फर्किएका छैनन् ।
सम्पत्ति शुद्धीकरण अनुसन्धान विभागको पत्रका आधारमा काठमाडौं जिल्ला अदालतले उनीहरूविरुद्ध गत २४ चैतमा पक्राउ पुर्जी जारी गरिसकेको छ ।
पक्राउ पुर्जी जारी भएसँगै देउवा दम्पतीलाई नेपाल ल्याउने प्रक्रिया अघि बढाएको थियो । देउवा दम्पतीविरुद्ध रेड नोटिसका लागि एनसीबीले औपचारिक रूपमा इन्टरपोललाई पत्राचार गरेको थियो । तर, इन्टरपोलले भने कागजात नपुगेको भन्दै रेड नोटिस जारी गरेन ।
रेड नोटिसका लागि इन्टरपोलले थप कागजात मागेको थियो । इन्टरपोलले मागेअनुसारको कागजात एनसीबी (नेसनल सेन्ट्रल ब्यूरो)ले विवरण पठाएको प्रहरी प्रधान कार्यालयका एक उच्च पदाधिकारीले जानकारी दिएको छ ।
रेड नोटिस जारी भएपछि उनीहरूलाई पक्राउ गरी कानुनी प्रक्रिया मार्फत नेपाल ल्याउने बाटो खुल्नेछ। एनसीबीले पठाएका पछिल्ला कागजातहरूको अध्ययनपछि इन्टरपोलले उनीहरूलाई ‘वाण्टेड’ सूचीमा राख्दै रेड नोटिस जारी गर्ने सम्भावना बढेको छ।
