काठमाडौँ । आन्दोलन पछि विद्यालय खुलेलगत्तै परीक्षाको तालिका सार्वजनिक भएपछि बालबालिकामा त्रास र भय बढेको भन्दै बाल अधिकारका लागि राष्ट्रिय अभियान नेपालले गम्भीर ध्यानाकर्षण गराएको छ ।
अभियानले एक विज्ञप्ति जारी गर्दै हालको परिस्थितिले बालबालिकाको मानसिक स्वास्थ्यमा नकारात्मक असर पारेको जनाएको छ । परीक्षाको तालिकाले बालबालिकामा त्रास, भय र मानसिक अस्थिरता बढाएकोले कम्तीमा एक हप्ता परीक्षा स्थगित गरी सह–शैक्षिक गतिविधि स्पोर्टस् हप्ता सञ्चालन गर्न अभियानले आग्रह गरेको छ । यसले बालबालिकाको अवस्था सामान्य बनाउन मद्दत पुग्ने अभियानको विश्वास छ ।
राष्ट्रिय बाल दिवसको अवसरमा जारी विज्ञप्तिमा अभियानले दसकौँ बितिसक्दा पनि बालबालिकाले गोली खानुपर्ने र ज्यानको बलिदानी दिनुपर्ने अवस्था विद्यमान रहेको भन्दै बालदिवशको औचित्यमाथि प्रश्न उठाएको छ । साथै, हरेक विपद् र संकटपछिको अवस्थामा बालबालिका थप जोखिममा पर्न सक्ने खतराप्रति सरोकारवालाको ध्यानाकर्षण गराइएको छ ।
जेनजी आन्दोलनमा ज्यान गुमाएका र घाइते भएका बालबालिकाको उपचार र राहतका लागि सहयोग गर्न पनि अभियानले अपिल गरेको छ । बालबालिकामा मानसिक स्वास्थ्य समस्या देखिए अभियानका सदस्य दिनिशाँ बानिया र कृतिका दाहाललाई सम्पर्क गर्न सकिने विज्ञप्तिमा उल्लेख छ ।
