नेदरल्याण्ड्स। हान्टाभाइरसको संक्रमण देखिएको ‘एमभी होन्डियस’ नामको क्रूज जहाजमा सवार यात्रु र चालक दलका सदस्यहरूलाई बोकेका दुईवटा विशेष विमान मंगलबार नेदरल्याण्ड्सको आइन्डहोभेन सैन्य विमानस्थलमा अवतरण गरेका छन्।
विदेश मन्त्रालयले दिएको जानकारी अनुसार अष्ट्रेलियाली अधिकारीहरूको समन्वयमा सञ्चालित पहिलो उडानमार्फत ६ जना यात्रु ल्याइएको छ भने त्यसको केही समयपछि अवतरण गरेको दोस्रो उडानले जहाजका २२ जना चालक दलका सदस्यहरूलाई सुरक्षित रूपमा नेदरल्याण्ड्स पुर्याएको हो।
ती सदस्यहरूमध्ये एक जना डच नागरिक र बाँकी २१ जना अन्य विभिन्न देशका नागरिक रहेका छन्।
विमानस्थलमा ओर्लिएका सबै यात्रु र चालक दलका सदस्यहरूको स्वास्थ्य सुरक्षालाई ध्यानमा राख्दै डच राष्ट्रिय स्वास्थ्य तथा वातावरण संस्थानले पूर्ण मेडिकल स्क्रिनिङ गर्ने र प्रयोगशाला परीक्षणका लागि सबैको नमुना संकलन गर्ने तयारी गरेको छ।
परीक्षणपछि तत्काल आ–आफ्नो देश फर्कन नसक्ने विदेशी यात्रु र चालक दलका सदस्यहरूका लागि स्थानीय होटलमा बस्ने उचित प्रबन्ध मिलाइएको छ। प्रारम्भिक तालिका अनुसार पहिलो विमानबाट आएका ६ यात्रुहरूलाई पछि अष्ट्रेलिया पठाउने अपेक्षा गरिएको छ।
यसैबीच, एमभी होन्डियस जहाजको सञ्चालक कम्पनी ओसनवाइड एक्सपिडिसनले जहाज हाल स्पेनको टेनेरिफ टापुबाट नेदरल्याण्ड्सको रोटरडामतर्फ प्रस्थान गरिसकेको विज्ञप्ति मार्फत जनाएको छ।
समुद्री मार्ग हुँदै यो यात्रा पूरा गर्न करिब ६ दिन लाग्ने अनुमान गरिएको छ भने आगामी आइतबारसम्म जहाज रोटरडाम आइपुग्ने अस्थायी तालिका तय गरिएको छ। स्वास्थ्य अधिकारीहरूले संक्रमण थप फैलिन नदिन र प्रभावितहरूको उपचारका लागि आवश्यक सबै सतर्कता अपनाइएको जानकारी दिएका छन्।
