काठमाडौं। नेपाली कम्युनिष्ट पार्टीका सांसद वर्षमान पुनले प्रतिनिधिसभाको नियमावलीमा रहेको नयाँ व्यवस्था कार्यान्वयन गर्दै संसदलाई अझ जीवन्त, उत्तरदायी र मर्यादित बनाउनुपर्ने बताएका छन्।
आइतबार बसेको प्रतिनिधिसभा बैठकमा बोल्दै उनले नियम ५६ नयाँ व्यवस्था भएको उल्लेख गर्दै यो गत प्रतिनिधिसभाबाट मात्र समावेश गरिएको बताए।
‘०६४ मा पनि थिएन, ०७० मा पनि थिएन, ०७४ मा पनि थिएन। किन राखियो भन्दा सदनलाई जीवन्त बनाउने उद्देश्यले,’ उनले भने, ‘मन्त्रीहरूसँग अन्तरक्रिया त भइरहन्थ्यो तर सभाको मुख्य नेता प्रधानमन्त्री नै हो। सरकार के गरिरहेको छ भन्ने विषयमा प्रत्यक्ष संवाद हुँदा सदन जीवन्त पनि हुन्छ र लोकतान्त्रिक पनि हुन्छ।’
उनले यस्तो अभ्यासले जनताप्रति उत्तरदायित्व बढ्ने र जनप्रतिनिधिले उठाएका प्रश्नको वास्तविक जवाफ प्राप्त हुने बताए। नियम कार्यान्वयनलाई सत्ता पक्ष वा प्रतिपक्षले इगोका रूपमा नलिन उनले आग्रह गरे।
‘प्रधानमन्त्री आउनुभयो, यो महिनाको नियमावली कार्यान्वयन भयो। संसद सफल भयो, अभ्यास पनि भयो। अब नियमावलीका व्यवस्थालाई नियमसंगत रूपमा नै अगाडि बढाऔं,’ उनले भने।
उनले सभामुखलाई कार्यव्यवस्था परामर्श समितिमा समीक्षा गर्न सुझाव दिँदै संसदलाई मर्यादित र नियमअनुसार अघि बढाउनुपर्नेमा जोड दिए।
‘झगडा गर्ने ठाउँ यो होइन। यो व्यवस्था दलगत हो, आफ्ना असहमति राख्ने ठाउँ हो। व्यक्तिगत रिसिइबी केही होइन,’ उनले स्पष्ट पारे।
