जुम्ला । जुम्लास्थित सडक डिभिजन कार्यालयले कर्णाली राजमार्गका सडक निर्माणका लागि ठेक्का सम्झौता गरेर पनि वर्षौँदेखि काम अलपत्र पारेका १६ वटा रुग्ण ठेक्का एकसाथ तोड्न प्रक्रिया सुरु गरेको छ। कार्यालयले कालिकोट, जुम्ला र मुगुमा सञ्चालित ती आयोजनाहरूले समयमा काम सम्पन्न नगरेपछि ठेक्का अन्त्य गरिनेसम्बन्धी १५ दिने सार्वजनिक सूचना प्रकाशित गरेको छ।
सडक डिभिजन कार्यालयका सूचना अधिकारी सौरभकुमार सिंहका अनुसार आर्थिक वर्ष २०७४/७५ देखि २०८२/८३ सम्म सम्झौता भएका कालिकोटका १२, जुम्लाका तीन र मुगु जिल्लाको एक गरी १६ वटा रुग्ण ठेक्का तोड्नका लागि प्रक्रिया अगाडि बढाइएको हो। ठेक्का लिने तर काम नगर्ने र आयोजना अलपत्र पार्ने प्रवृत्ति अन्त्यका लागि कार्यालयले यो कदम चालेको सिंहको भनाइ छ।
विभिन्न मितिमा लिखित तथा मौखिक रूपमा काम सम्पन्न गर्न अनुरोध तथा जानकारी गराउँदासमेत निर्माण व्यवसायीले कुनै चासो नदेखाएकाले सार्वजनिक खरिद कानुनमा भएको व्यवस्थाबमोजिम ठेक्का रद्द गर्ने प्रक्रिया थालिएको सडक डिभिजन कार्यालयका प्रमुख श्रवणकुमार महतराले बताए।
कानुनअनुसार ठेक्का सम्झौता अन्त्य गरी सम्बन्धित निर्माण कम्पनीलाई कालोसूचीमा राख्ने, कार्यसम्पादन जमानत तथा धरौटी बापतको रकम जफत गर्ने र पेस्की रकमको १० प्रतिशत ब्याज असुल गर्ने तयारी कार्यालयले गरेको छ। यसका साथै ती आयोजनाको बाँकी काम गर्न लाग्ने खर्च समेत सरकारी बाँकी सरह असुलउपर गर्नेतर्फ कारबाही अगाडि बढाइने प्रमुख महतराले स्पष्ट पारेका छन्। यसअघि पनि कर्णाली राजमार्गमा काम अलपत्र पारिएका सडकका १० वटा रुग्ण आयोजनाको ठेक्का तोडिसकिएको सडक डिभिजन कार्यालयले जनाएको छ।
