तेहरान । इरानले अमेरिकाको सैन्य आक्रमणको दृढ र कडा जवाफ दिने चेतावनी दिएको छ । साथै, वर्तमान अवस्थामा कुनै पनि प्रकारको वार्तामा सहभागी हुने योजना नरहेको इरानले स्पष्ट पारेको छ । इरानका विदेश मन्त्रालयका प्रवक्ता इस्माइल बघाइले बुधबार तेहरानमा आयोजित एक स्मृति कार्यक्रममा सञ्चारकर्मीसँग कुरा गर्दै भने– ‘अहिले हाम्रो वार्ताको कुनै योजना छैन । हाम्रो सम्पूर्ण ध्यान देशको रक्षा गर्न केन्द्रित छ ।’
अमेरिकाले आफ्ना प्रतिबद्धता उल्लङ्घन गरे इरान कुनै पनि सम्झौताप्रति बाध्य नहुने उनले बताए । बघाइले भने– ‘यदि अमेरिकाले आफ्नो दायित्व उल्लङ्घन गर्छ भने हामी कुनै सम्झौताको पालना गर्दैनौँ । यो हाम्रो सिद्धान्त हो र हामी यसैमा अडिग रहनेछौँ ।’ उनका अनुसार इरानको धारणा छ कि अमेरिका युद्धविराम लागू भएको सुरुदेखि नै त्यसको पालना गर्न असफल भएको छ ।
यता, बघाइको अभिव्यक्ति सार्वजनिक भएको केहीबेरमै इरानको अर्धसरकारी मेहर समाचार एजेन्सीले स्ट्रेट अफ होर्मुज नजिक रहेको हेन्गाम टापुमा अमेरिकी सेनाले आक्रमण गरेको जनाएको छ । यसैबिच, अमेरिकी सेनाको सेन्ट्रल कमान्ड (सेन्टकम) ले पनि बुधबार इरानविरुद्ध थप एक चरणको हवाई आक्रमण सम्पन्न भएको पुष्टि गरेको छ ।
अमेरिकी पक्षका अनुसार ती आक्रमणहरू स्ट्रेट अफ होर्मुजमा जहाजहरूलाई लक्षित गर्ने इरानको क्षमता कमजोर पार्ने उद्देश्यले गरिएको हो । अमेरिकाले इरानविरुद्ध सैन्य आक्रमण जारी राखेको यो लगातार पाँचौँ दिन हो ।
