उपप्रधानमन्त्री श्रेष्ठको नेतृत्वमा नेपालले १० औं बीआरआई सम्मेलनमा भाग लिने

काठमाडौँ / नेपालले चीनको बेइजिङमा हुने १० औं बेल्ट एन्ड रोड इनिसिएटिभ (बीआरआई) सम्मेलनमा उपप्रधान तथा गृहमन्त्री नारायणकाजी श्रेष्ठको नेतृत्वको टोलीले सहभागिता जनाउने भएको छ । उक्त सम्मेलन बेइजिङमा यही अक्टोबर १७ र १८ मा हुँदैछ ।

केही समयअघि प्रधानमन्त्री पुष्पकमल दाहालले एसियाली खेलकुदको उद्घाटन समारोहमा सभागिता जनाउँदै चीनको भ्रमण गरेका थिए । त्यसपछि हुन लागेको बीआरआईको १० औं सम्मेलनमा सरकारले उपप्रधान तथा गृहमन्त्री श्रेष्ठलाई पठाउन लागेको हो । कूटनीतिक स्रोतका अनुसार सुरुआतमा भौतिक पूर्वाधार तथा यातायातमन्त्री प्रकाश ज्वालाको नेतृत्वमा जाने गरी गृहकार्य गरे पनि पछि उपप्रधानमन्त्री श्रेष्ठकै नेतृत्वमा नेपाली टोली जान लागेको हो ।

चीनका राष्ट्रपति सी चिनफिङको नेतृत्वमा सन् २०१३ मा बीआरआईको सुरुआत गरेका थिए । त्यसलाई सुरुआतमा वान बेल्ट वान रोड भनियो । तर सन् २०१५ बाट बेल्ट एन्ड रोड इनिसिएटिभ नामकरण गरिएको हो ।

नेपालले सन् २०१७ मा बेल्ट एन्ड रोड इनिसिएटिभमा हस्ताक्षर गरेको हो । तर उक्त इनिसियटिभबाट नेपालले हालसम्म कुनै पनि परियोजना अघि बढाएको छैन । प्रधानमन्त्री दाहालको चीन भ्रमणमा पनि उक्त परियोजनाको बारेमा नेपालले सकारात्मक सन्देश दिए पनि परियोजनाको सवालमा भने कुनै पनि प्रगति भएन ।

चीनले नेपालसँग बीआरआई प्रोग्राम इन्म्पिमेन्टेसन प्लान’ मा हस्ताक्षर गर्न आग्रह गरेको थियो । तर नेपालले बीआरआई अन्तर्गत अनुदान र सहुलियत ऋणमात्र लिने सन्देश चीनलाई दियो ।