बीबीसी । पाकिस्तानका पूर्वप्रधानमन्त्री इमरान खान र उनकी पत्नी बुशरा बीबीलाई १० वर्षको जेल सजाय भएको एक दिनपछि अर्को मुद्दामा १४ वर्षको जेल सजाय सुनाइएको छ । विपक्षीहरूले प्रधानमन्त्रीको रूपमा अपदस्थ गरेका खान, भ्रष्टाचारको आरोपमा दोषी ठहरिएपछि तीन वर्षको जेल सजाय भोगिरहेका छन् ।
मंगलबार उनलाई राज्यको गोप्य कुरा चुहावट गरेकोमा र बुधबार भ्रष्टाचारको मुद्दामा थप १४ वर्षको सजाय सुनाइएको छ । खानले आफू विरुद्ध भएका कैयौँ मुद्दा राजनीतिक रूपमा प्रेरित भएको बताएका छन् । अदालतका फैसला फेब्रुअरीमा हुने पाकिस्तानको राष्ट्रिय चुनावको एक हप्ता अगाडि आएका छन् – जहाँ उनलाई उभिन प्रतिबन्ध लगाइएको छ ।
खानलाई गत अगस्टदेखि नै गिरफ्तार गरिएको थियो । बुधबारको फैसलापछि उनकी श्रीमती बुशरा बीबीले आत्मसमर्पण गरिन् । खान प्रधानमन्त्री निर्वाचित हुनुभन्दा महिनौं अघि यी दुईले २०१८ मा विवाह गरेका थिए । दम्पतीलाई व्यक्तिगत लाभका लागि प्राप्त राज्य उपहारहरू अवैध रूपमा बेचेको आरोप थियो । उनको पार्टीका प्रवक्ताले उक्त निर्णयबारे भने, ‘हाम्रो न्यायिक प्रणालीको इतिहासमा अर्को दुखद दिन, जुन ध्वस्त हुँदैछ।’
पूर्वप्रधानमन्त्रीले मंगलबार आफूविरुद्धको मुद्दा झुटो भएको भन्दै अदालतको फैसलाको आलोचना गरेका थिए । खान, एक पूर्व अन्तर्राष्ट्रिय क्रिकेटर पनि हुन् । ट्विटरमा जारी गरिएको विज्ञप्तिमा खानले ‘फेब्रुअरीमा शान्तिपूर्ण रहँदा तपाईको मतदानबाट हरेक अन्यायको बदला लिन’ जनतालाई आग्रह गरेका छन् ।