बीबीसी । दक्षिणी गाजाको रफाह क्षेत्रमा इजरायलले ठूलो सैन्य कारबाही गर्न लागेको आशङ्कामा अमेरिकाले इजरायललाई उपलब्ध गराउन लागेको विस्फोटक पदार्थ रोकेको छ ।
‘सीबीएस’लाई ती अधिकारीले बताएअनुसार त्यो खेपमा १,८०० वटा ९०७ केजीका बम र १,७०० वटा २२६.८ केजीका बम थिए । रफाह क्षेत्रमा भएका गैरसैनिक नागरिकहरूको विषयमा अमेरिकाले व्यक्त गरेको सरोकारलाई इजरायलले ’पूर्ण रूपले सम्बोधन नगरेको’ ती अधिकारीको भनाइ छ ।
इजरायलले यस विषयमा तत्काल कुनै टिप्पणी गरेको छैन । इजरायली सेनाले इजिप्टसँग सीमा जोडिएको भागपट्टि रफाह नाकामा नियन्त्रण कायम गरेको केही घण्टापछि मङ्गलबार राति गाजा स्ट्रिपमा थप हवाई आक्रमण गरेको छ ।
इजरायलले रफाह क्षेत्रवरिवरि सघन बम आक्रमण गरिरहेको छ। स्थानीय स्वास्थ्यकर्मीहरूका अनुसार राति भएको एउटा आक्रमणमा एउटै परिवारका सात जनाको मृत्यु भएको छ । गाजामा सहायता पठाउनका लागि रहाफ एउटा महत्त्वपूर्ण नाका हो । गत अक्टोबर महिनामा इजरेल र हमासबीच लडाइँ सुरु भएपछि उक्त नाका हुँदै हजारौँ मानिसहरू अन्यत्र गएका छन्।