संयुक्त राज्य अमेरिकाको विशेष चासोका बीच चिनियाँ विदेशमन्त्री वाङ यीले साना तर रणनीतिक रूपमा महत्त्वपूर्ण टापु राष्ट्रहरूसँगको सम्बन्धलाई प्रगाढ बनाउन बिहीबारदेखि दक्षिण प्रशान्त टापुका देशहरूको औपचारिक भ्रमण गर्दैछन् ।
वाङ यीको भ्रमण तालिकामा मे २६ देखि जुन ४ सम्म सोलोमन टापु, किरिबाटी, सामोआ, फिजी, टोंगा, भानुआटु, पपुवा न्युगिनी र पूर्वी टिमोरको भ्रमण समावेश छ। वाङको भ्रमणले अर्थतन्त्र, पूर्वाधार, जलवायु परिवर्तन, जनस्वास्थ्य, प्रहरी र सुरक्षालगायत धेरै क्षेत्रमा सहकार्य र सम्झौताहरूको प्रस्तावलाई समेट्ने बताइएको छ।
‘चीनको उपस्थितिलाई यस क्षेत्रका देशहरूले स्वागत गर्नुको कारण चीनले स्थानीयहरूको जीविकोपार्जनलाई प्रवर्द्धन गर्न र ती टापुहरूको आर्थिक सम्भावनालाई सक्रिय बनाउँन सक्छ भन्ने हो,’ विज्ञहरूले टिप्पणी गरेका छन्। यद्यपि केही पश्चिमी सञ्चार माध्यमले सुरक्षासम्बन्धी सहयोगमा मात्र ध्यान केन्द्रित गरेका छन्।
साथै सहयोगले नयाँ शीतयुद्ध फैलाउन सक्छ भनेर बढाइचढाइ गर्ने प्रयास समेत गरिएको छ । पत्रकार सम्मेलनमा वाङ वेनबिनले वाङ यीको दक्षिण प्रशान्त महासागरको भ्रमणको उद्देश्य चीन र सम्बन्धित देशहरूबीचको मैत्रीपूर्ण र सहयोगात्मक सम्बन्धलाई थप प्रगाढ बनाउनुका साथै एशिया–प्रशान्त क्षेत्रको शान्ति, स्थिरता र समृद्धिमा योगदान पुर्याउने रहेको बताएका छन् ।
‘म केही व्यक्तिहरूको सनसनीपूर्ण टिप्पणीसँग पूर्ण रूपमा असहमत छु। म यो अवसरलाई चीन–पीआईसी सहयोगको बारेमा केही तथ्यहरू सार्वजनिक गर्न चाहन्छु,’ उनले भने ।
संयुक्त राज्य अमेरिका जसले पहिले चीन र सोलोमन टापुहरू बीचको सुरक्षा सम्झौताको बारेमा चिन्ता देखाएको छ । उसले दक्षिण प्रशान्त राष्ट्रहरूलाई चीनसँगको “छाया“ सम्झौताहरूबाट सावधान रहन चेतावनी दिदै सहयोगलाई नाटकीय रूपमा विस्तार गर्न थप प्याकेज अगाडि बढाएको छ ।