बैंकक । थाइल्यान्डका पूर्वप्रधानमन्त्री थाक्सिन शिनावात्रा रिहा भएका छन् । दशकौँदेखि थाइल्यान्डको राजनीतिमा विवाद र ध्रुवीकरणको केन्द्र रहेका पूर्वप्रधानमन्त्री शिनावात्रालाई भ्रष्टाचार मुद्दामा एक वर्षको जेल सजाय सुनाइएकाे थियाे ।
७६ वर्षीय थाक्सिनले सोमबार रिहा हुनुअघि आठ महिना जेलमा बिताएका थिए । बैंककको क्लोङ प्रेम केन्द्रीय कारागार बाहिर उनको स्वागत गर्न लगभग ३०० समर्थक र राजनीतिक सहयोगीहरू भेला भएका थिए । समर्थकहरूले थाक्सिनको नाममा नारा लगाइरहेका थिए । तर उनले मिडियासँग कुरा गर्न अस्वीकार गरेका छन् ।
थाक्सिन शिनावात्रा दूरसञ्चार व्यवसायमा संलग्न एक अर्बपति व्यापारी थिए । उनले सन् १९९८ मा आफ्नै राजनीतिक दल गठन गरे र २००१ मा थाइल्याण्डको प्रधानमन्त्री बने । २००६ मा सैन्य विद्रोहमा उनको सरकार अपदस्थ गरियो ।
त्यतिबेला उनी विदेश भ्रमणमा थिए । त्यसपछि थाई राजनीतिले लगभग दुई दशकसम्म तीव्र राजनीतिक द्वन्द्व र ध्रुवीकरण भोग्यो । थाक्सिनमाथि शक्तिको दुरुपयोग, आफ्नो व्यावसायिक स्वार्थलाई फाइदा पुर्याउने र सरकारी चिट्ठा परियोजनामा अनियमितता गरेको आरोप लगाइएको थियो । उनको अनुपस्थितिमा उनलाई दोषी ठहराइएको थियो ।
यद्यपि, २०२३ मा उनी घर फर्किए र अदालतमा उपस्थित भए । सुरुमा आठ वर्षको जेल सजाय सुनाइएको भए पनि थाइल्याण्डका राजा महा वजिरालोङकोर्नले पछि सजाय घटाएर एक वर्षमा झारेका थिए ।
स्वास्थ्यको कारण देखाउँदै थाक्सिनलाई बैंककको प्रहरी अस्पतालको विशेष वार्डमा आफ्नो सजाय बिताउन अनुमति दिइएको थियो । विपक्षीहरूले उनलाई विशेष उपचार प्रदान गरेको आरोप लगाए । त्यसपछि, सेप्टेम्बर २०२५ मा सर्वोच्च अदालतले उनलाई जेलमा आफ्नो सजाय पूरा गर्न आदेश दिएको थियो ।
हालै, न्याय मन्त्रालयको एक समितिले राम्रो आचरण, बढ्दो उमेर र पुनः अपराध गर्ने सम्भावना कम भएको उल्लेख गर्दै उनको प्यारोललाई स्वीकृत गरेको छ । रिहा भएपछि उनी आगामी चार महिनासम्म निगरानीमा रहनेछन् ।
उनले बैंककमा आफ्नो घरमा बस्नुपर्नेछ, इलेक्ट्रोनिक निगरानी ब्रेसलेट लगाउनुपर्नेछ र नियमित रूपमा अधिकारीहरूलाई रिपोर्ट गर्नुपर्नेछ ।
