एमाले गठबन्धन जोगाउन माधव नेपाललाई राष्ट्रपति मात्रै नभएर पार्टी अध्यक्ष नै दिने अवस्थामा पुगेको थियोः गगन थापा
काठमाडौं । नेपाली कांग्रेसका महामन्त्री गगन थापाले आठ दलीय गठबन्धन पाँच वर्ष तलमाथि नहुने बताएका छन् ।
शुक्रबार आठ दलका बागमती प्रदेश सभा सदस्यहरुका लागि काठमाडौंमा गरिएको अभिमुखीकरणका क्रममा महामन्त्री थापाले यो गठबन्धन पाँचवर्ष दयाँबायाँ नहुने समझादारी भएको बताएका हुन् ।
उनले यसपटक कांग्रेस जिम्मेवारकासाथ अघि बढ्ने बताए । महामन्त्री थापाले यो गठबन्धन फुटाउन कुनै धराप नथाप्न एमालेलाई आग्रह गरे ।
उनले भने,’यो गठबन्धनविरुद्ध कसैले धराप नथापे हुन्छ। कांग्रेससँग चकचक गरेर अब तेल निस्किनेवाला छैन।’ उनले एमालेसँग मिल्ने कुरा अहिलेसम्म कुनै प्रसंगमा कुरा नभएको बताए ।
उनले भने,’यो पाँचवर्ष सहमति कार्यान्वयनका सबैभन्दा ठुलो दलको हैसियतले कांग्रेस लाग्छ । यो राजनीतिक इमानदारिताको कुरा पनि हुन्छ । पाँचवर्ष सहमति अनुसार कहीँ कतै अल्मलाउन नआए हुन्छ ।’
उनले चुनावपछि पाँच दलीय गठबन्धन टुट्नुमा ठूलो दल भएको हैसियतले सबैभन्दा धेरै जिम्मेवारी कांग्रेसले लिनुपर्ने बताए । उनले भने, ‘त्यो गल्ती सच्चाएर एकैठाउँमा उभिएका छौं । अहिले जे भइरहेको छ त्यसमा सन्तोष मानेर यो गठबन्धनलाई बचाउनुपर्छ ।’
उनले प्रचण्डलाई प्रधानमन्त्री बन्ने कुरा ठूलो नभएकै कारणले अहिले एकैठाउँमा उभिन सकेको बताए । महामन्त्री थापाले एमाले अध्यक्ष केपी शर्मा ओलीको लहडले ५ वर्ष खेर गएको बताए । उनले एमालेले गठबन्धन जोगाउन माधव नेपाललाई राष्ट्रपति मात्रै नभएर पार्टी अध्यक्ष नै दिने अवस्थामा पुगेको दाबी गरे ।