युक्रेन र रुसले बख्मुत सहरमा जारी लडाइँ तीव्र बन्दा ठूलो मानवीय क्षति भएको जनाएका छन् । पूर्वी युक्रेनको उक्त सहरलाई महिनौँदेखि जारी युद्धका बीच मस्कोले कब्जा गर्ने प्रयास गरिरहेको छ ।
युक्रेनी राष्ट्रपति भोलोदिमिर जेलेन्स्कीका अनुसार पछिल्ला केही दिनयता ११ सयभन्दा बढी रुसी सेनाले ज्यान गुमाएका छन् र द्वन्द्वका कारण धेरै मानिसहरू गम्भीर घाइते भएका छन् ।
उनले करिब १५ सय रुसी सैनिकहरू सैन्य कारबाहीमा सामेल हुन नसक्नेगरी घाइते भएको जानकारी समेत दिए । रुसले भने पछिल्लो २४ घण्टामा २२० भन्दा बढी युक्रेनी सैनिकलाई मारिदिएको जनाएको छ ।
बख्मुतको रणनीतिक महत्व कम भएको तर क्रेमलिनलाई कुनै खालको सकारात्मक खबर दिन सङ्घर्षरत रुसी कमान्डरहरूका लागि केन्द्रबिन्दु बनेको विश्लेषकहरू बताउँछन् ।
उक्त सहर कब्जा गर्दा रुसलाई पूरा डोनेट्स्क क्षेत्र नियन्त्रणमा लिने आफ्नो लक्ष्य निकट पुर्याउने छ । डोनेट्स्क पूर्वी र दक्षिणी युक्रेनका चार क्षेत्रहरूमध्ये एक हो जसलाई रुसले गत वर्ष सेप्टेम्बरमा नियन्त्रणमा लिएको थियो ।
त्यहाँ जनमत सङ्ग्रह सञ्चालन गरेपछि धेरै देशहरूले त्यस कदम अनुचित भएको भन्दै आलोचना गरेका थिए । भाडाको सेना आपूर्ति गर्ने समूह द वाग्नर बख्मुतस्थित रुसी आक्रमणको केन्द्रमै छन् । उक्त समूहका अगुवा येभगेनी प्रिगोजिनले बख्मुत कब्जा गर्न आफू र आफ्ना निजी सेनाको प्रतिष्ठालाई दाउमा राखेका छन् ।
उनले आइतबार सहरको अवस्था निकै कठिन भएको र दुस्मन हरेक मिटरका लागि लडिरहेको बताएका थिए ।