नारायण गाउँले ।
ढाकाकुमार र कोर टिमलाई लिएर अनुत्तरित प्रश्नहरू अझै बाँकी छन् तर पार्टीले जुन स्पीडमा निलम्बन, प्रारम्भिक छानबिन र कारबाही गर्यो, त्यसले नयाँ दल र पुरानो दल भन्ने स्पष्ट छुट्टिने रहेछ । ढाकाकुमारले मागेको अनुचित र गैरकानुनी आर्थिक सहयोग थियो, त्यसले भोलि नीतिनिर्माण तहमा चलखेल हुने सम्भावना थियो होला तर प्रत्यक्ष राष्ट्रघात थिएन त्यो । तैपनि उनलाई बचाउन पार्टीको कुनै निकाय लागेको देखिएन । अडियोबाहेक अर्को प्रमाण पनि थिएन ।
तर, सिङ्गो देशको इज्जत र विश्वसनीयतामाथि नै प्रश्न उठ्ने गरी मानव–तस्करीको यत्रो सङ्गठित अपराधमा प्रारम्भिक अनुसन्धान सकेर प्रहरीले पक्राउ गर्ने अवस्थामा पुग्दा समेत निलम्बन त परको कुरो, ’पूर्वमन्त्री जस्तो विशिष्ट व्यक्तिलाई बाटैबाट समाउनु गम्भीर षड्यन्त्र र रहस्यमय भएको’ बयान पुराना पार्टीबाट आयो । प्रधानमन्त्रीलाई नै भेटेर अनुसन्धानमा प्रभाव पार्ने काम भयो ।
अब देशले कुन मुखले भुटानी शरणार्थीबारे भूटानसँग वार्ता गर्न सक्ला ? भूटानले त्यसै पनि धेरै जसो शरणार्थी नक्कली भएको आरोप लगाउँदै आएको छ । त्यसैलाई बल पुर्याउँदै देशको सरकार नै मुछिएको देखिएपछि भविष्यमा यस्ता विषयमा नेपालको अन्तर्राष्ट्रिय ’नेगोसिएशन’ त्यसै कमजोर हुनेछ । यसले देशवासीलाई मात्रै होइन, हजारौं भुटानी शरणार्थीलाई समेत शङ्का र अपमानको घेरामा ल्याउँछ । नयाँ एकदम स्वच्छ छ, खुश्बुदार छ भनेर होइन, पुरानो चाहिँ असह्य गनाएपछि आमजनताले नयाँ दल छानेका हुन् । पुरानाचाहिँ सरसफाइको साटो झन् दुर्गन्ध थप्न लालायित हुनु तिनकै लागि समेत दुर्भाग्यको विषय हो । अलिकति आस्था, विश्वास र भरोसा राख्ने ठाउँ त छोडि़दिनु नि ! कि अब बाटो छोडि़दिनु !