काठमाडौँ । वैदेशिक रोजगारीमा आकर्षक तलबको प्रलोभनमा पारी विभिन्न देश पठाइदिन्छु भन्दै रकम ठगी गरेको अभियोगमा ३ जनालाई प्रहरीले पक्राउ गरेको छ ।
पक्राउ पर्नेमा कपिलवस्तुको वाणगङ्गा नगरपालिका-८ घर भएकी ३६ वर्षीया दिलमाया गैरे, भक्तपुरको चाँगुनारायण नगरपालिका-५ घर भएका २८ वर्षीय सन्देश ढुङ्गाना र कास्कीको रूपा गाउँपालिका-१ घर भएका ३० वर्षीय विशाल खवास राना रहेका छन् ।
पक्राउ परेकामध्ये दिलमायाले अमेरिका पठाइदिन्छु भन्दै एक जनाबाट रु सात लाख, सन्देशले क्रोएसिया पठाइदिन्छु भन्दै दुई जनाबाट रु १६ लाख र विशालले सर्विया पठाइदिन्छु भन्दै एक जनाबाट रु दुई लाख लिइ सम्पर्कविहीन भएका भन्ने पीडितको उजुरीका आधारमा काठमाडौँ उपत्यका अपराध अनुसन्धान कार्यालय टेकुबाट खटिएको प्रहरीले दिलमायालाई काठमाडौँ महानगरपालिका-१३ बाट, सन्देशलाई भक्तपुर चाँगुनारायण नगरपालिका-७ बाट र विशाललाई काठमाडौँ महानगरपालिका-११ बाट पक्राउ गरेको हो ।
पक्राउ परेकामध्ये दिलमायालाई आवश्यक अनुसन्धान तथा कारबाहीका लागि जिल्ला प्रहरी परिसर काठमाडौँ पठाइएको छ भने सन्देश र विशाललाई वैदेशिक रोजगार विभाग, ताहाचल काठमाडौँमा पठाइएको छ ।
