देश होलीमय भैरहेका बेला सत्तारुढ घटक राष्ट्रिय स्वतन्त्र पार्टीका शीर्ष नेताहरुले आयोजना गरेको एक पार्टी कार्यक्रममा माओवादी उपाध्यक्ष कृष्ण महादुर महराको पक्राउ प्रकरणलाई उत्सवमय रुपमा चित्रित गर्नु भएको छ । राष्ट्रिय स्वतन्त्र पार्टी (रास्वपा) ले शनिबार सम्पन्न गरेको ‘वर्तमान सन्दर्भमा पार्टीको कार्यनीति विषयक विशेष सम्बोधन’ कार्यक्रममा सबै नेताको चर्चाको केन्द्रमा माओवादी उपाध्यक्ष महरा देखिनु भयो । काठमाडौँको एक ब्यान्क्वेटमा आयोजित कार्यक्रममा गृहमन्त्री समेत रहनु भएका सभापति रवि लामिछाने, उपसभापति डा. स्वर्णिम वाग्लेले महरालाई तारो बनाउदै प्रहार गर्नु भयो । आफ्नो पार्टीको सत्तारोहणको विजयका रुपमा महरा प्रकरणलाई उहाँहरुले व्याख्या गर्नु भयो ।
चैत्र ५ गते अप्रत्याशित रुपमा पक्राउ परेर ४ दिनपछि अदालतको आदेशका आधारमा छुटनु भएका माओवादी उपाध्यक्ष महरालाई राज्यले करुणा देखाएर छाडिएको झुटो दाबी उपप्रधान तथा गृहमन्त्री लामिछानेले गर्नु भयो । अदालतको आदेश नै गृहमन्त्रालयको सल्लाहामा आएको अर्थ लाग्ने खालको दाबी उहाँको थियो ।
गृहमन्त्रीसंग करुणा थियो भने त महरा स्तरको नेतालाई रोल्पा जादै गर्दा कपिलबस्तुमा किन छापामार शैलीमा पक्राउ गर्नु पर्दथ्यो र ? सुन तस्करी प्रकरणमा पहिलो पटक नै सिआईवीमा गएर लिखित बयान दिनु भएका महरालाई फोन मात्रै गरेको भए पनि उहाँ आफैं हाजिर हुन सक्ने विकल्पहरु बिर्सेर बाघ मारे जस्तै उहाँको गिरफ्तारीको हौवा पिटाउने पनि गृहमन्त्री नै हुनुहुन्थ्यो । मुल कुरा महरा मन्त्रीपरिषद, गृहमन्त्रालय वा प्रचण्ड र रबिहरुको करुणा, दया र कृपाले छुटनु भएकै होईन । अदालतको आदेशले छुटनु भएको हो । अदालतमा गृहमन्त्री हैन, न्यायधिशहरु बस्ने गर्छन भन्ने त सबैलाई हेक्का छ । गहृमन्त्रीजीलाई यो कुराको हेक्का भएन भाषण गर्दा टंगस्लीप भयो ?
राज्यको करुणा हुन्छ भने ४ दिनको लागि महरालाई भुत्रो गर्न पक्राउ गरेको गृहमन्त्री ज्यू ? आफ्नै स्टन्ट र भाइरलगिरी धेरै भयो भन्ने लाग्दैन तपाईलाई ? चैत्र ५ गते पक्राउ गरेर ४ दिनमा अदालतले छाडेपछि तपाई नाजावाफ हुनु भाकोले करुणाको भाका हालेर फेससेभ गर्नु भाको हो की ? गृहमन्त्रीजीको यस्तो खालको कामलाइ उहाँको हल्लुड़े लम्पटहरुले जय गाउलान तर एउटा सचेत नागरिकको हैसियतले तिम्रो यस्तो ४ दिन पनि नटिक्ने फ्यान्तु काम सस्तो राजनीतिक प्रचार मात्र हो ।
अझ रास्वपाका उपसभापति स्वर्णिम वाग्ले त महरालाई पक्राउ गर्नु नै रास्वपा सरकारमा जानुको औचित्य रहेको भान हुने गरी महरा पक्राउ प्रकरणलाई विजयोत्सवको रुपमा व्याख्या गर्नु भयो ।
महरा विरुद्धको कारवाही प्रधानमन्त्री प्रचण्डलाई झट्का हो भन्ने पाराको उपसभापति वाग्लेको कथन थियो । महरालाई प्रचण्डका सुपर सारथि भन्दै नेता वाग्लेले महरा मार्फत माओवादी र प्रचण्डलाई नै आफ्ना सभापतिले ठेगान लगाउन थालेको हुँकार दिनु भयो । माओवादी आन्दोलनको विद्रुपीकरण र प्रचण्डको क्षयीकरणका रुपमा डा. वाग्लेले महरा प्रकरणलाई चित्रित गर्नुको सिधा अर्थ हो, यो गठबन्धनमा रास्वपालाई अस्थायी हिरोईज्मको लोभ छ । माओवादी विरुद्ध पूर्वाग्रह र आक्रामकता छ । प्रधानमन्त्रीय प्रणलीमा प्रधानमन्त्रीको दल र तिनका नेतालाई खुईल्याएर गृहको साँचो रबिकै खाँचो पनि त भैनरहरन सक्छ भन्ने डा. वाग्लेले ख्याल गरेको देखिएन ।
रास्वपाका सभापति लामिछाने र उपसभापति वाग्लेले महरा पक्राउ प्रकरणको राजनीतिक स्टन्टसंगै गृहमन्त्री थप आक्रामक हुने जनाउँ पनि दिनु भयो । समर्थकहरुको ताली खान त उहाँहरुका वाणिहरु ठीकै होलान । तर धरातलीय यथार्थ के हो भने
महराको खोइरो खन्न मात्र उहाँहरु केन्द्रीत हुनुले उहाँहरु माओवादी विरुद्ध नै आक्रामक हुदै जाने संकेत गरेको छ । प्रधानमन्त्री प्रचण्डले संसदबाटै रबिलामिछानेलाई सहकारी ठगी प्रकरणमा निर्दोष रहेको ऐलान गरेकै आलोकमा रास्वपाका नेताहरुको माओवादी नेतृत्वलाई खुईल्याउने होडबाजीले सत्तागठबन्धनको आयुमा नै प्रभाव नपार्ला भन्न सकिन्न ।