केही दिनको झडपपछि थाई सीमा नजिकैको प्रमुख व्यापारिक केन्द्रमा म्यान्माको जुन्ता सैनिक आफ्नो स्थानबाट फिर्ता भएको एउटा जातीय सशस्त्र समूहले बिहीबार बताएको छ । यो लडाइँमा सामेल सेनाका लागि अर्को झट्का हो ।
महत्त्वपूर्ण व्यापारिक सहर म्यावाडीनजिकैको सीमामा थाइल्यान्डका एएफपीका संवाददाताहरूले बिहीबार बिहान गोली चलेको आवाज सुनेका थिए । अघिल्लो रात त्यहाँ सयौँ मानिस राज्यमा सुरक्षा खोज्न लाइनमा बसेका थिए ।
बिहीबार दिउँसोसम्म थाइल्यान्डको माई सोट सहरमा मानिसहरूको प्रवाह कम भएको थियो । छब्बीस वर्षीय सादीजस्ता मानिस उत्सुकतापूर्वक आफन्तहरूको प्रतीक्षा गरिरहेका थिए । “मैले यसलाई एक साथ राख्ने विचारमा छु”, उनले भने । आफ्नो फोन पुनः निरीक्षण गर्दै उनले हुनेवाला बेहुली अझै म्यान्मामा रहेको जानकारी दिए ।
सन् २०२१ मा सेनाले लोकतान्त्रिकरूपमा निर्वाचित सरकारलाई अपदस्त गरेपछि म्यान्मा द्वन्द्वको चपेटामा परेको छ तर हालैका महिनाहरूमा व्यापक क्षतिपछि जुन्ताले अहिलेसम्मकै सबैभन्दा गम्भीर खतराको सामना गरिरहेको छ ।
करेन नेसनल युनियन (केएनयु) का लडाकू र अन्य जुन्ताविरोधी समूहहरूले यसै साता म्यावाडी सहरमा हमला गरेका थिए । जुन्ताको वाणिज्य मन्त्रालयलका अनुसार नगदको अभावमा परेको जुन्ताका लागि म्यावाडी एउटा महत्त्वपूर्ण सम्पत्ति हो । यहाँबाट अप्रिलसम्मको १२ महिनामा एक अर्ब १० करोड डलरभन्दा बढीको व्यापार भएको थियो ।
केएनयुका प्रवक्ता पडोह साव ताव नीले सहरमा बाँकी दुई सय वा त्योभन्दा धेरै जुन्ता सैनिक बुधबार राति आफ्नो स्थानबाट फिर्ता भएको बताए ।
उनले म्यावाडीलाई थाई सीमावर्ती सहर माई सोटसँग जोड्ने एउटा पुलमा अहिले सैनिकले आश्रय लिइरहेको जानकारी दिए । उनले केएनयुले अहिले पूरा सहरमा नियन्त्रण गरिरहेको दाबी गरे ।
म्यावाडीसम्म पुग्न पत्रकारहरूलाई अनुमति नभएकाले एएफपीले उक्त दाबीलाई स्वतन्त्ररूपमा पुष्टि गर्न सकेन तर एक थाई सीमा अधिकारीले सहर बुधबार रातिसम्म ‘पतन’ भएको बताएका छन् ।
बिहीबार ३७ डिग्री सेल्सियसको गर्मीमा थाई सैनिक र बख्तरबन्द गाडीहरू सीमामा अलर्ट अवस्थामा थिए । त्यहाँ एएफपीका पत्रकारहरूले स्थानीय समयानुसार बिहान १०ः३० बजे एउटा विमान म्यावाडीको दिशामा उड्दै गरेको देखेका थिए ।
म्यावाडीका बासिन्दाहरूले सेनाले सहरमा हवाई हमला गरिरहेको तर सडकमा केएनयुका लडाकूहरू नदेखेको बताएका छन् । हालैका महिनाहरूमा युद्धको मैदानमा धेरै हारको सामना गर्नुपरेको जुन्ताका लागि म्यावाडी सहरमाथि पूर्ण कब्जा अपमानजनक पराजय हुनेछ ।
यद्यपि स्वतन्त्र म्यान्मा विश्लेषक डेभिड म्याथिसनले भने, “वास्तवमा म्यावाडीलाई कसले नियन्त्रण गरेको छ र उपस्थितिको विपरित वास्तवमा नियन्त्रण के हो भन्नेबारे आकलन गर्न अहिले नै हतार हुनेछ ।”
थाई सीमामा ‘फ्रेन्डसिप ब्रिज नम्बर २’ मा सामान्यतया म्यान्मामा औषधि, उपभोग्य सामान र निर्माण सामग्री बोक्ने ट्रकहरू निष्क्रियरूपमा रहेको एएफपीका संवाददाताहरूले देखेका थिए । थाई सीमाका एक अधिकारीले दुवैतर्फ चेकपोस्ट खुला रहेको तर कुनै मालसामानको यातायात नचलेको बताए ।
म्यान्माको जुन्ताले म्यावाडीतर्फ थप सेना पठाइरहेको सैन्य स्रोतले बिहीबार बताएको छ । यद्यपि सहरका केही मार्ग विरोधीहरूको नियन्त्रणमा रहेकाले सेना कहिले र कसरी पुग्नेछ भन्नेबारेमा स्पष्ट छैन ।