सुदूरपश्चिम । सुदूरपश्चिम प्रदेशको मुख्यमन्त्रीमा नेकपा एकीकृत समाजवादीका संसदीय दलका नेता दीर्घ सोडारी नियुक्त भएका छन् । बिहीबार प्रदेश प्रमुख नजिर मियाँले सोडारीलाई मुख्यमन्त्रीमा नियुक्त गरेका हुन्।
नेकपा एमाले, माओवादी केन्द्र, नेकपा एकीकृत समाजवादी र नागरिक उन्मुक्तिका सांसदको समर्थनमा सोडारीले मुख्यमन्त्रीमा दाबी पेश गरेका थिए । यसअघि आइतबार नागरिक उन्मुक्ति पार्टीका दुईजना सांसदको मुख्यमन्त्रीका लागि दाबी पेश भएको थियो ।
नागरिक उन्मुक्तिका लक्ष्मणकिशोर चौधरीलाई नेपाली कांग्रेस, एकीकृत समाजवादीको समर्थन रहेको थियो । त्यस्तै कैलाश चौधरीलाई माओवादी केन्द्र र एमालेको समर्थन थियो। नाउपा संसदीय दल विभाजित भएपछि प्रदेश प्रमुख नजिर मियाँले दुवै दाबी खारेज गर्दै संविधानको धारा १६८ (२) अनुसार मंगलबार पुनः सरकार गठनका लागि आह्वान गरेका थिए।
प्रकाशित: ६ बैशाख २०८१, बिहीबार १२:००