गगनको प्रश्नः अर्काको नाकको डाँडी उडीउडी भाँच्ने कुरा गर्दा वाहवाह, आफ्नोबारे सोध्दा मलाई के थाहा, भन्न पाइन्छ ?
काठमाडौं । नेपाली कांग्रेसका महामन्त्री गगन थापाले गलत काम गर्ने जोसुकैलाई कानुनी दायरामा ल्याउनुपर्ने बताएका छन् ।
शनिबार इलाममा आयोजित चुनावी सभालाई सम्बोधन गर्दै महामन्त्री थापाले खराब काम गर्ने कांग्रेस, एमाले, माओवादी वा नयाँ दल जोसुकैलाई कानुनी दायरामा ल्याउनुपर्ने बताएका हुन् ।
उनले भने, ‘कोही कांग्रेसले खराब काम गर्छ त्यसलाई थुन्ने हो, कोही एमालेले खराब काम गर्छ भने त्यसलाई थुन्ने हो, माओवादीले खराब काम गर्छ भने त्यसलाई पनि थुन्ने हो । तपाइँको जिल्लामा आएको नयाँ पार्टीको उम्मेदवार वा नेताले खराब काम गर्छ भन्ने थुन्ने कि के गर्ने भनेर मतदाताले प्रश्न गर्नुपर्छ । अर्काको नाकको डाँडी उडी उडी भाँच्ने कुरा गर्दा वाह वाह । आफ्नो बारे सोध्दा मलाई के थाहा, भन्न पाइन्छ?’
उनले वर्तमान सत्ता गठबन्धन माघ महिनासम्म भत्किसक्ने दाबी गरे । उनले चुनाव अगाडिको गठबन्धन जनतालाई धोका भएको बताए । महामन्त्री थापाले इलामबाट नेपालमा चुनावअघिको गठबन्धनको राजनीति चल्दैन भन्ने सन्देश दिन जरुरी रहेको बताए ।