इतुरी । प्रजातान्त्रिक गणतन्त्र कंगो (डीआरसी) को उत्तरपूर्वी इतुरी प्रान्तमा सशस्त्र विद्रोहीहरूले गरेको आक्रमणमा कम्तीमा ६९ जनाको ज्यान गएको छ।
द्वन्द्वग्रस्त यो क्षेत्रमा खनिज सम्पत्तिको नियन्त्रणका लागि विगत ३० वर्षदेखि विभिन्न सशस्त्र समूहहरू सक्रिय रहँदै आएका छन्। सुनका लागि धनी मानिने इतुरी प्रान्तमा विशेषगरी हेमा र लेन्डु समुदायबिच लामो समयदेखि हिंसात्मक संघर्ष जारी छ।
सुरक्षा स्रोतका अनुसार लेन्डु समुदायको रक्षा गर्ने दाबी गर्ने कोअपरेटिभ फर द डेभलपमेन्ट अफ द कंगो (कोडेको) सँग आबद्ध लडाकूहरूले अप्रिल २८ मा विभिन्न गाउँहरूमा आक्रमण गरेका थिए। यो आक्रमण हेमा समुदायका लागि लड्ने दाबी गर्ने कन्भेन्सन फर द पपुलर रिभोलुसन (सीआरपी) समूहले कंगोको सेनामाथि गरेको आक्रमणको बदलास्वरूप भएको बताइएको छ।
नागरिक समाजका नेता डिएडोने लोसाले कोडेकोको प्रतिकारमा ७० भन्दा बढी मारिएको बताएका छन् भने अन्य सुरक्षा अधिकारीहरूले १९ विद्रोही र सैनिकसहित ६९ जनाको मृत्यु भएको पुष्टि गरेका छन्।
विद्रोहीहरूको उपस्थितिका कारण शवहरू सङ्कलन गर्न धेरै दिन ढिलाइ भएको र अझै पनि धेरै शवहरू सङ्कलन गर्न बाँकी रहेको लोसाले जानकारी दिएका छन्। बासा गाउँ नजिकै जताततै शवहरू छरिएको अवस्थामा भेटिएको मानवीय सहायता स्रोतले बताएको छ।
