काठमाडौं । नेकपा माओवादी केन्द्रका केन्द्रीय सदस्य लेखनाथ न्यौपानेले सहकारी ठगीसम्बन्धी गम्भीर प्रश्न उठेका व्यक्तिलाई गृहमन्त्री बनाउनु सकारात्मक संकेत नभएको बताएका छन् । सामाजिक संजालमार्फत न्यौपानेले बहुमत पुर्याउने नाममा विवादास्पद व्यक्तिलार्ई गृहमन्त्रीको जिम्मेवारी दिनु राजनीतिक नैतिकता नभएको बताएका हुन् ।
उनले भनेका छन्,‘संघीय सरकारमा कहिले योसँग त कहिले उसँग मात्र होइन, बहुमत पुर्याउने नाममा दोहोरो राहदानी प्रयोग र सहकारी सम्बन्धी गम्भीर प्रश्न उठेका व्यक्तिलाई नै गृहमन्त्री बनाउनाले ०५२ पछि संसदीय जोडघटाउमा जुन राजनैतिक अनैतिकता प्रयोग भएको थियो, मन्त्रीको संख्या बाहेक हुबहु दोहोरियो भन्ने सन्देश निरन्तर प्रवाह भएको छ । यो अलिकति पनि सकारात्मक संकेत होइन ।’
त्यसैगरी उनले सरकार बनाउने र भत्काउने खेलले संघीयता विरोधीलाई बल पुगेको बताएका छन् । उनले भने, ‘साथै सरकार बन्ने र भत्कने, फेरि नयाँ गठबन्धनको नाममा बहुमत पुर्याउन ठेउके, झारपात र झ्यासहरुलाई समेत मन्त्री बनाउँदै प्रदेश सरकार (सात वटै) को आयु लम्ब्याउने वा बहुमत देखाउने राजनैतिक अनैतिकताको खेलले एकातिर संघीयता बिरोधीहरुलाई बल पुगेको छ भने अर्कोतिर सर्वसाधारण जनता समेत प्रदेश संरचनाको साथै संघीयता नै आवश्यक छैन भन्ने ठाउँमा बिस्तारै पुग्दै छन् । बेलैमा सोच्ने र कदम चाल्ने हो कि !’