पूर्वोत्तर मालीमा इस्लामवादी विद्रोहीहरूले एउटा डुङ्गामा आक्रमण गर्दा कम्तीमा ४९ सर्वसाधारण नागरिकको मृत्यु भएको छ । उनीहरूले एउटा सैन्य शिविरमा पनि आक्रमण गरी १५ सैनिकको हत्या गरेका छन् ।
आक्रमणकारीहरूतर्फ झन्डै ५० जनाको ज्यान गएको बताइएको छ । घटनापछि सरकारले तीन दिनका लागि राष्ट्रिय शोक घोषणा गरेको छ । स्थानीय समयानुसार बिहीबार बिहान ११ बजे सशस्त्र आतङ्ककारी समूहले डुङ्गामा आक्रमण गरेको मालीको सेनाले जनाएको छ ।
कम्तीमा तीनवटा रकेटले डुङ्गाको इन्जिनलाई लक्ष्य बनाएर आक्रमण गरेको डुङ्गा सञ्चालक कम्पनी कमन्याभले एएफपी समाचारसंस्थालाई बताएको छ । त्यसपछि उक्त डुङ्गालाई नदीमै रोकी सेनाले यात्रुहरूलाई बाहिर निकालेको कमन्याभका एक अधिकारीले बताएका छन् ।
रुसी भाडाका सैनिकहरूको समूह वाग्नरले आफ्नो अभियान फिर्ता लिन लागेको सेनाको दाबी छ। मालीमा इस्लामवादी आक्रमणका धम्कीहरू बढिरहेका छन् । गत महिनाको अन्त्यदेखि उत्तरी नगर टिम्बक्टूमा नाकाबन्दी गरिएको छ।
त्यहाँ यातायातका साधनमाथि बारम्बार आक्रमण भइरहेको छ । नीजेर नदीमा बहँदै गाओबाट मोप्ती सहरतर्फ जान लागेको डुङ्गामा आक्रमण भएको बताइएको छ। गाओ क्षेत्रकै बोरेम सर्कलमा रहेको सैन्य शिविरमा पनि आक्रमण भएको छ । सन् २०२० देखि मालीमा सैन्य सरकारले शासन गरिरहेको छ।