काठमाडौं । नेकपा माओवादी केन्द्रका नेता तथा कोशी प्रदेश सभाका पूर्वसभामुख बाबुराम गौतमले कोशी प्रदेश अनिश्चयको बाटोमा गएको भन्दै चिन्ता व्यक्त गरेका छन् ।
सभामुख हुँदा विश्वासको मत दिएर एमाले नेतृत्वको सरकार ढालेका गौतमले आइतबार सामाजिक संजालमार्फत विगतमा आफूबाट भएको गल्तीको प्रायश्चित गर्दै राजनीतिक अस्थिरता बढेको चिन्ता व्यक्त गरेका हुन् ।
उनले भनेका छन्, ‘खै के गरियो ? अस्थिरता, अराजकता र अनिश्चित भविष्यको बाटामा मेरो प्रदेश ।’ गौतमले गौतमले सरकार ढाल्न सभामुख भएर पनि मतदान गरेका थिए भने पछि सभामुखबाट राजीनामा दिएर कांग्रेस नेतृत्वमा सरकार बनाउन सहयोग गरेका थिए । सभामुखबाट राजनीमा दिएपछि गौतम आर्थिक योजनामन्त्री बनेका थिए ।
तर अहिले गौतमले दुबै पद गुमाइसकेका छन् । विश्वासको मत नपाउने अवस्था भएपछि मुख्यमन्त्री हिक्मत कार्कीले शनिबार राजीनामा दिएका छन् । मुख्यमन्त्रीले राजीनामा दिएपछि प्रदेश प्रमुख परशुराम खापुङले सरकार गठनका लागि दलहरुलाई आह्वान गरेका छन् ।
प्रदेश प्रमुख खापुङले संविधानको धार १६८ (५) अनुसार असोज २६ गते शुक्रबार साँझ पाँच बजेभित्र दलहरुलाई दाबी पेश गर्न आह्वान गरेका हुन् । यसअनुसार सरकार गठन हुन सकेन वा यस उपधाराअनुसार नियुक्त हुने मुख्यमन्त्रीले ३० दिनभित्र विश्वासको मत पाएन भने प्रदेशसभा स्वतः विघटन हुनेछ र मध्यावधि निर्वाचन हुनेछ ।