सुदूरपश्चिममा एकीकृत समाजवादीका सोडारी मुख्यमन्त्री बन्ने दाउमा, लक्ष्मणकिशोर चौधरीलाई दिएको समर्थन फिर्ता
सुदूरपश्चिम । सुदूरपश्चिम प्रदेशमा सरकार गठनका लागि नयाँ खेल सुरु भएको छ । बैशाख २ गते मुख्यमन्त्रीका लागि दुई जनाले दावी पेश गरेको भएपनि अहिलेसम्म कसैलाई प्रदेश प्रमुखले नियुक्ति दिएका छ्रनन् ।
मंगलबार फेरि बैशाख २ गते नागरिक उन्मुक्तिका लक्ष्मणकिशोरलाई दिएको समर्थन एकीकृत समाजवादीले फिर्ता लिएको छ । यो संगै अब सरकार गठन प्रकृया कसरी अघि बढ्ने भन्ने अन्योलता बढेको छ ।
आइतबार प्रदेश प्रमुख नाजिर मियाँले दिएको समयभित्र नागरिक उन्मुक्ति पार्टी (नाउपा) का लक्ष्मणकिशोर चौधरी र कैलाश चौधरीले मुख्यमन्त्रीमा दाबि पेश गरेपनि अहिलेसम्म प्रदेश प्रमुखले निर्णय लिएका छैनन् । यसैबीच प्रधानमन्त्री पुष्पकमल दाहाल प्रचण्ड र एकीकृत समाजवादीका सम्मानित नेता झलनाथ खनालको मंगलबार बिहान बालुवाटरमा भएको छलफल पछि सुदूरपश्चिमको राजनिति नयाँ विकल्पमा अघि बढेको छ ।
सुदूरपश्चिमका एमाले, माओवादी केन्द्र, एकीकृत समाजवादी र नाउपाका केही सांसदहरुले छलफल गरेर समाजवादीलाई मुख्यमन्त्री दिने सहमति भएको छ । नाउपाका दुई सांसदले मुख्यमन्त्रीमा दाबी पेश गरेको अवस्थामा एकीकृत समाजवादीलाई कसरी मुख्यमन्त्री दिन सकिन्छ भन्ने कानुनी पाटो अहिले छलफल भइरहेको बुझिएको छ ।
प्रदेश प्रमुखले दुवै दाबीलाई रद्द गरेर नयाँ आह्हवान गर्न सक्ने बताइएको छ ।
आइतबार गरिएको दाबीमा लक्ष्मणकिशोरले कांग्रेससहित २८ सांसदको समर्थन पेश गरेका छन् भने कैलाश चौधरीले २३ सांसदको समर्थन सूची पेश गरेका छन् ।